Umuyobozi w’Umuryango wa Kiyovu Sports, Ndorimana Jean François Régis uzwi nka Général, yahumurije abakinnyi b’iyi kipe abizeza ko baticaye ubusa.
Nyuma y’umukino ikipe ya Kiyovu Sports yatsinzemo Marines FC ibitego 2-1 ku munsi wa Karindwi wa shampiyona, umutoza mukuru w’iyi kipe yo ku Mumena, Petros Koukouras, yumvikanye atabariza abakinnyi be avuga ko bamubereye Intwari nyuma yo gutsinda kandi badahembwa.
Uyu mutoza yagaragaje ko muri iyi kipe ubuzima butameze neza ndetse no kubona aho ikorera imyitozo ari ikibazo.
Nyamara n’ubwo Petros yavuze ibi, umuyobozi w’ikipe, Ndorimana Jean François Régis uzwi nka Général, yari kumwe n’abakinnyi mu rwambariro ari kubashyikiriza agahimbazamusyi k’umukino bari bamaze gutsindamo Marines FC.
Général yumvikana asezeranya abakinnyi ko n’ubwo hari ibibazo byugarije ikipe, ubuyobozi buticaye ubusa kuko buri gukora igishoboka cyose ngo abakinnyi babeho neza.
Uyu muyobozi yabijeje ko n’ubwo batarabona agahimbazamusyi k’umukino batsinze wa Gorilla FC, ariko buri mukino bazajya batsinda bazajya bahita bahabwa agahimbazamusyi umukino ukirangira.
Ndorimana yabwiye abakinnyi ko ubuyobozi buri gukora iyo bwabaga, ngo ikipe ibashe kubaho neza.
HABIMANA SADI/UMUSEKE.RW