Ikipe ya Manchester United yo mu gihugu cy’u Bwongereza yongeye gutakaza umukino ku nshuro ya Gatandatu mu marushanwa yose, Real Madrid na Bayern Munich zongera guhamya ko ari abami ba UEFA Champions League.
Mu ijoro rya tariki ya 3 Ukwakira ku mugane w’i Burayi hakinwaga imikino y’umunsi wa Kabiri kuva mu itsinda A kugeza mu itsinda D muri UEFA Champions League.
Ni imikino yagiye gukinwa harebwa uko amakipe atandukanye aza kwitwara cyane cyane amakipe yari yaritwaye neza mu mukino wa mbere ndetse n’andi Atari yagize ibihe byiza nka Manchester United yari yatsinzwe ndetse na Real Madrid yari yatsinze umukino nta nkuru.
Uko imwe mu mukino yagenze:
Manchester United yongeye kwandagazwa:
Ku isaha ya Saa Tatu z’ijoro, ikipe ya Manchester United kuri Stade yayo Old Trafford yari yakiriye ikipe ya Galatasaray yo muri Turkey. Manchester United imaze igihe mu minsi mibi hari hategerejwe kureba niba iza kwiyunga n’abafana bayo dore ko iyi kipe yaherukaga no gutsindwa umukino wa shampiyona.
Manchester United yatangiye neza umukino itsinda igitego cya mbere cyatsinzwe na Rasmus Hojlund ku munota wa 17 ahawe umupira na Marcus Rashford.
Ibyishimo bya Manchester United ntibyatinze kuko ikipe ya Galatasaray ku munota wa 23 yahise yishyura igitego cyatsinzwe na Wilfried Zaha ahawe umupira na Davinson Sanchez, Igice cya mbere kirangira ari 1-1.
Igice cya kabiri cyatangiranye n’imbaraga ku ruhande rwa Manchester United, maze ku munota wa 67 Rasmus Hojlund atsinda igitego cya kabiri.
- Advertisement -
Manchester United yibwiye ko umukino urangiye ariko ku makosa y’umuzamu wayo Andre Onana, ku munota wa 71 Galatasaray yatsinze igitego cya kabiri cyatsinzwe na Kerem.
Manchester United yongeye kurota nabi ubwo ku munota wa 77, Casemiro yahabwaga ikarita y’umutuku azira gutega Icardi mu rubuga rw’amahina biturute kuri Onana watanze umupira nabi. Galatasaray yahawe penaliti ariko Mauro Icardi ayiteye, umuzamu Onana aikuramo.
Ku munota wa 81 Mauro Icardi yatsinze igitego cya gatatu cya Galatasaray ubwo yari ahawe umupira na Davinson Sanchez. Umukino urangira Manchester United itsinzwe ibitego 3-2, biba umukino wa 6 itsinzwe mu mikino 10 kuva iyi shampiyona yatangira.
Real Madrid yavuye mu Butaliyani yemye:
Ikipe ya Real Madrid yari yagiye gukina n’ikipe ya Napoli mu Butaliyani, no Real Madrid itari yagize umukino mwiza ubwo yakinaga na Union Berlin kuko yatsinze umukino bigoranye.
Kuri iyi nshuro ikipe ya Real Madrid yitwaye neza itsinda ikipe ya Napoli ibitego 3-2, harimo igitego cyatsinzwe na Vinicius Junior ku munota wa 27 ahawe umupira na Jude Bellingham, Jufmse atsinda icya kabiri ku munota wa 34, mu gihe icya gatatu kitsinzwe na Miret wa Napoli ku munota wa 78.
Ibitego bibiri bya Napoli byatsinzwe na Ostigard ku munota wa 14 na Zilenski ku munota wa 54.
Uko Indi mikino yagenze:
Ikipe ya Bayern Munich yavuye inyuma itsinda ikipe ya Copenhagen yo muri Norvège ibitego 2-1. Ibitego bya Bayern Munich byatsinzwe na Jamal Musiala na Mathys Tell.
Ikipe ya Arsenal yari yasuye ikipe ya Lens mu Bufaransa ihatsindirwa ibitego 2-1.
Ikipe ya Inter Milan yatsinze ikipe ya Benfica igitego 1-0.
PSV yo mu Buhorandi inganya na Sevilla yo muri Espagne ibitego 2-2.
Union Berlin itsindwa na Braga ibitego 3-2.
Real Sociadad itsinda ikipe ya Salsburg ibitego 2-0.
Mugiraneza Thierry/UMUSEKE.RW
