Ambasaderi Claver Gatete yarahiriye inshingano nshya zo kuyobora Komisiyo y’Umuryango w’Abibumbye Ishinzwe Ubukungu muri Afurika.
Ni indahiro yagiriye imbere y’Umunyamabanga Mukuru w’Uyu Muryango, António Guterres.
Claver Gatete wari umaze umwaka n’igice ahagarariye u Rwanda mu Muryango w’Abibumbye, yahawe izi nshingano zo kuba Umunyamabanga Nshingwabikorwa wa Komisiyo y’Umuryango w’Abibumbye Ishinzwe Ubukungu muri Afurika, mu ntangiro z’ukwezi gushize k’Ukwakira 2023.
Ku rubuga rwa X rwahoze ari twitter, rwa Komisiyo ya UN ishinzwe Ubukungu muri Afurika, ivuga ko “Mu muhango wo gutangira ku mugaragaro inshingano z’Umunyamabanga Nshingwakorwa wa ECA, Claver Gatete yabonanye n’Umunyamabanga Mukuru wa UN, António Guterres ku wa 08 Ugushyingo 2023.”
Ambasaderi Claver Gatete wasimbuye Umunya-Cameroon Vera Songwe wari usoje manda ye yo kuba Umunyamabanga Nshingwabikorwa wa UN ECA, yageze I Addis Ababa mu cyumweru gishize ari na bwo yakirwaga n’abasanzwe bakora muri iyi Komisiyo.
https://x.com/ECA_OFFICIAL/status/1722497130156130780?s=20
UMUSEKE.RW