Perezida Yoweri Kaguta Museveni yatangaje ko umugore we ameze neza nubwo abaganga basanze yaranduye COVID-19.
Ku wa Kane abinyujije ku rukuta rwa X yahoze yitwa Twitter, Museveni yavuze ko kuri Noheli (tariki 25/12/2023) ubwo barimo basangira ifunguro rya saa sita, Maama Janet (niko Museveni yise umugore we), yatangiye kuribwa mu muhogo.
Perezida Museveni avuga ko bahise bagerageza gupima mu buryo bwihuse (Covid rapid test) ngo barebe ko yanduye Corona virus, ariko basanga ntayo afite.
Janet Museveni ngo yari afite intege nke, aribwa umutwe kandi akomeje kubabara mu muhogo, niko kujya gufatisha ibizamini bya Corona Virus i Mbarara hakoreshejwe uburyo bwa PCR test, basanga yaranduye.
Ku wa Kabiri tariki 26 Ukuboza, 2023 Perezida Yoweri Museveni na we yakoresheje ibizamini bya Covid basanga ari muzima.
Ati “Icyo kwibaza ni uburyo ntanduye kandi maze igihe ndi kumwe na Maama (Janet) muri ino minsi, twajyanye mu modoka tugiye Entebbe, tunasubira Nakasero. Byaba byaratewe n’uko narokotse Corona muri Gicurasi? Maama (Janet) nibwo bwa mbere agiye guhangana na Corona. Ameze neza.”
Janet Museveni yahise yishyira mu kato muri imwe mu nzu z’umuryango wabo ahitwa Rwakyitura (Rwakitura) ari naho hari urugo rwa Perezida Yoweri Museveni mu Karere ka Kiruhura mu Burengerazuba bwa Uganda.
Perezida Yoweri Museveni yavuze ko ku wa Gatatu yagiranye ibiganiro na General Mohamed Hamdan Dagalo uyoboye inzibacyuho muri Sudan, baganira ku ntambara iri muri icyo gihugu.
Museveni yatangaje ko azagirana inama n’aborozi bo mu Karere ka Kiruhuura tariki 02 Mutarama, 2024.
- Advertisement -
UMUSEKE.RW