Inzego z’umutekano zirashakisha umubyeyi witwa Uwamahoro Vestine uri mu kigero cy’imyaka 35 y’amavuko wo mu Mudugudu wa Mikingo mu Kagari ka Mubumbano mu Murenge wa Kagano ukekwaho kwiyicira umwana w’amezi ane.
UMUSEKE wamenye ko Uwamahoro yavuye mu Kagari ka Mubumbano ku wa 29 Ugushyingo 2023 ari kumwe n’uwo mwana witwaga Masengesho Emmanuel ariko ku wa 03 Ukuboza agaruka atamufite.
Icyo gihe yabwiye abaturanyi be bagize amakenga bamubaza aho umwana ari maze abasubiza ko yaguye mu Bitaro bya Bushenge, bakomeje kumuhata ibibazo arabatoroka.
Umuyobozi w’agateganyo w’Akarere ka Nyamasheke, Muhayeyezu Joseph Desire yabwiye UMUSEKE ko usibye amakuru yatanzwe na Uwamahoro y’uko umwana yaguye mu Bitaro bya Bushenge nta kindi baramenya.
Yagize ati ” Biracyari mu iperereza, aracyashakishwa, kuba ataraboneka ngo atange ibisubizo ku ibura ry’uwo mwana nibyo biteye inkeke, nizeye ko ari buboneke kugira ngo tubone amakuru arambuye yaho uwo mwana ari”.
Muhayeyezu yasabye abaturage kuzirikana uburenganzira bw’umwana abibutsa ko umwana agomba kurindwa no kwitabwaho anasabasa gukomeza umuco wo gutangira amakuru ku gihe.
DONATIEN MUHIRE
UMUSEKE.RW i Nyamasheke
