Ubuyobozi bw’ikipe ya Rayon Sports, bwatangaje ko iyi kipe yamaze kubona umunyezamu ukomoka muri Sénégal, uje gusimbura Hakizimana Adolphe watandukanye na yo.
Mu minsi ishize ni bwo AS Kigali yatangaje ko yamaze gusinyisha umunyezamu, Hakizimana Adolphe wari usoje amasezerano ye muri Rayon Sports.
Nyuma yo gutakaza uyu munyezamu, iyi kipe ikunzwe na benshi mu Rwanda, yahise itangira gushaka ibindi bisubizo mu buryo bwihuse.
Mu gushaka igisubizo, Rayon Sports yahise izana Khadime Ndiaye ukomoka mu gihugu cya Sénégal.
Uyu musore w’imyaka 27, ntihatangajwe uko amasezerano ye angana ariko amakuru avuga ko yasinye umwaka umwe ushobora kongerwa.
Mu gihe yaba agiriwe icyizere, Ndiaye ashobora kwifashishwa ku mukino w’umunsi wa 16 wa shampiyona, Rayon Sports ifitanye na Gasogi United ku wa Gatanu tariki ya 12 Mutarama 2024 Saa kumi n’ebyiri z’ijoro kuri Kigali Pelé Stadium.
Yakiniye amakipe arimo Génération Foot na Guédiawaye FC z’iwabo muri Sénégal. Aje yiyongera kuri Hategekimana Bonheur na Simon Tamale.
HABIMANA SADI/UMUSEKE.RW