Ubushinwa bwemeje ko bwafatiye ibihano bikakaye ibigo by’ubucuruzi bikomeye byo muri Amerika biherutse kugurisha intwaro kuri Taiwan.
Izo kompanyi zafatiwe ibihano ni BAE Systems Land and Armament, Alliant Tecsystems Operation, AeroVirnonment, ViaSat hamwe na Link Solutions.
Ibi bitangajwe mu gihe Taiwan irimo yitegura amatora y’umukuru w’igihugu ku wa 13 Mutarama 2024.
Amerika kugurisha intwaro kuri Taiwan ni intandaro y’umwuka mubi hagati ya Amerika n’Ubushinwa.
Ubushinwa bufata Taiwan nk’ubutaka bwayo, ibyo ubutegetsi bwa Taiwan bwamaganira kure.
- Advertisement -
Mu kwezi gushize, Minisiteri y’Ububanyi n’Amahanga ya Amerika yemeje igurishwa ry’ibikoresho bifit agaciro ka miliyoni 300 z’amadorali ya Amerika mu mu mugambi wo gushimangira ikoranabuhanga ryabo mu guhanahana amakuru no kurwanya abanzi.
Ku Cyumuweru gishize, Minisiteri y’Ububanyi n’Amahanga y’Ubushinwa yasohoye itangazo ko ibi bihano byari ibyo kwihimura kuri ibi bikorwa bibi bya Amerika.
Rivuga kandi ko igurishwa ry’intwaro riheruka ribangamira bikomeye ubusugire n’umutekano by’Ubushinwa, rihungabanya amahoro n’umutekano muri Taiwan.
Ubushinwa bushimangira ko buzafatira imitungo y’izo kompanyi bwongere bubuze abaturage n’amashyirahamwe mu Bushinwa gukorana nayo, nk’uko Minisiteri y’Ububanyi n’Amahanga ibivuga.
Ubushinwa busanzwe bufata Taiwan nk’Intara yabwo, ni mu gihe Taiwan yifata ko ari igihugu kitagendera ku Bushinwa, gifite itegeko nshinga n’abategetsi batowe mu nzira ya demokarasi.
DIANE UMURERWA / UMUSEKE.RW