Umufasha w’Umugaba Mukuru w’Ingabo z’u Rwanda, Madamu Solange Kamuzinzi Mubarakh yanyomoje bikomeye abakwije ibihuha bivuga ko yahungiye Arizona muri Leta Zunze Ubumwe za Amerika.
Ni nyuma y’ibyasakajwe ku mbuga nkoranyambaga n’abarwanya u Rwanda, bavuze ko Umufasha wa Gen Mubarakh Muganga yahunze igihugu, akaba ari kwaka ubuhungiro muri Leta Zunze Ubumwe za Amerika.
Abakwije ibyo bihuha banavuze ko n’umufasha w’Umuvugizi w’Ingabo z’u Rwanda, Brig Gen Ronald Rwivanga nawe yahungiye i Ohio muri Amerika.
Abinyujije ku rukuta rwe rwa Facebook, Madamu Solange Kamuzinzi Mubarakh yahaye urw’amenyo abakwiza ibyo bihuha bagamije kubona ababakurikira ku mbuga nkoranyambaga (Views).
Yagize ati ” Ngo habaye iki amakuru numva mu mihanda ya Arizona 
ngo nakoze iki ? Nahunze Urwanda ? Izo views mungurisha mumpeho icyacumi kabisa 
Sha iyo Bababwira Never again mwumva iki?”
Yakomeje agira ati “Mujye mwohereza Icyacumi Mu Rwanda ,Murarugurisha Nirwo rubatunze muragakizwa !”
Solange Kamuzinzi Mubarakh asanzwe yunganira abantu mu bijyanye n’amategeko, akaba ari n’umuvugabutumwa.
NDEKEZI JOHNSON / UMUSEKE.RW
