Rutahizamu wa Kiyovu Sports, Obediah Mikel Freeman, yafatiriye ibikoresho birimo imipira kubera ideni aberewemo.
Ikipe ya Kiyovu Sports ikomeje kugorwa n’ibibazo by’amikoro kuva uyu mwaka w’imikino watangira.
Kuri ubu hongeye kugaragaramo ibibazo by’amadeni, ikipe ibereyemo abakinnyi.
Obediah Mikel Freeman, kwihangana byanze maze afatira ibikoresho by’ikipe birimo imipira.
Ibi byabaye mu myitozo yo ku wa Mbere tariki ya 8 Mutarama 2024, ubwo uyu mukinnyi fataga ibikoresho akavuga ko abisubiza ari uko yishyuwe.
Amakuru yizewe UMUSEKE wamenye, avuga ko Cabangula yasabaga byibura ibihumbi 300 Frw mu yo aberewemo kugira ngo atange ibikoresho ikipe ikomeze imyitozo.
Uyu mukinnyi ngo yahawe ibihumbi 150 Frw, maze yemera gutanga ibyo yari yafatiriye.
UMUSEKE wifuje kuvugana n’ubuyobozi bwa Kiyovu Sports, ariko bose baruciye bararumira.
Mu minsi ishize, iyi kipe yo ku Mumena yafatiwe ibihano na FIFA byo kubuzwa kwandikisha abakinnyi bashya kubera kwirukana Ndikumana Codjifa mu buryo bunyuranyije n’amategeko.
- Advertisement -
HABIMANA SADI/UMUSEKE.RW