Ubushinjacyaha bwo muri Repubulika ya Demokarasi ya Congo, bwasabiye umunyamakuru uzwi cyane, Stanis Bujakera gufungwa imyaka 20.
Stanis Bujakera yatawe muri yombi muri Nzeri mu 2023, nyuma yo kwandika inkuru mu kinyamakuru Jeune Afrique cyo mu Bufaransa, avuga ko umunyapolitiki utavuga rumwe n’ubutegetsi Chérubin Okende yishwe na ba maneko ba Congo.
Muri Nyakanga mu mwaka ushize, umurambo wa Okende bawusanze mu modoka ye mu gitondo i Kinshasa ahitwa Limeté, warashwe amasasu, nyuma y’umunsi ishyaka rye ritangaje ko yashimuswe n’abitwaje intwaro.
Ubushinjacyaha bwakomeje kuvuga ko Okende yiyishe.
Okende yahoze ari Minisitiri wo gutwara abantu n’ibintu, yegura mu Kuboza mu 2022.
Ubwo yapfaga yari umudepite akaba n’umuvugizi w’ishyaka Ensemble pour la République rya Moïse Katumbi.
Mu iburanisha ryo ku wa gatanu, Jean-Marie Kabengela, umwe mu banyamategeko ba Bujakera, yabwiye abanyamakuru hanze y’urukiko ko ubushinjacyaha bwamusabiye gufungwa imyaka 20, no kuriha ihazabu ya miliyoni imwe y’amafaranga ya Congo (angana na 463,000Frw), nkuko byatangajwe n’ibiro ntaramakuru Reuters.
Kabengela yongeyeho ko bategereje ko urukiko rusoma urubanza, ibyo bikaba bishobora kuba mu cyumweru gitaha.
Umuryango uharanira uburenganzira bwa muntu Human Rights Watch wavuze ko urubanza rwa Bujakera rushingiye ku mpamvu za politiki.
- Advertisement -
Umuryango uharanira uburenganzira bw’abanyamakuru ku isi, Committee to Protect Journalists, wasabye ko Bujakera “arekurwa aka kanya kandi nta mananiza”.
Bujakera ni umunyamakuru w’Umunye-Congo ukorera ibitangazamakuru mpuzamahanga bitandukanye, birimo na Reuters.
Yatawe muri yombi ku itariki ya 8 Nzeri mu mwaka ushize, nyuma yaho aregwa gukwirakwiza amakuru atari ukuri ajyanye n’urupfu rwa Okende.
Mu rubanze we ahakana ibyo aregwa nawe agashimangira ko afunzwe ku mpamvu za Politiki.
Muri Nzeri mu mwaka ushize, Jeune Afrique yavuze ko ihagaze kuri iyo nkuru yatangaje ku itariki ya 31 Kanama uwo mwaka.
Reuters yatangaje ko iyo nkuru ya Jeune Afrique yari irimo ko raporo y’imbere igenewe abakozi y’urwego rw’igihugu rw’ubutasi rwa Congo yari yashinje ba maneko ba gisirikare kuba bishoboka ko bagize uruhare mu iyicwa rya Okende.
Jeune Afrique yasabye ko arekurwa, ivuga ko atari we wanditse iyo nkuru kandi ko nta zina rye ryari riyiriho. Reuters na yo yasabye ko Bujakera arekurwa.
Abategetsi bo muri Congo bacyemanze ubuziranenge bw’iyo nkuru, mu kwezi gushize bavuze ko Okende yiyambuye ubuzima bwe.
UMUSEKE.RW