Biciye mu bihembo Ngarukakwezi bitangwa na Kompanyi ikora ibijyanye n’imikino y’amahirwe (Betting), Gorillas Games, ibihembo ngaruka kwezi bihabwa abakinnyi n’abatoza bitwaye neza, byegukanywe n’abarimo Tuyisenge Arsene wa Rayon Sports ndetse na Pavelh Ndzila wa APR FC.
Ni ibihembo byatanzwe ku mugoroba w’ejo hashize ku wa Gatanu tariki ya 17 Gicurasi, bitangwa ku bufatanye na shampiyona y’u Rwanda na Gorilla Games.
Abakinnyi n’umutoza bahembwe, ni abitwaye neza muri Werurwe na Mata 2024.
Nk’ibisanzwe hahembwe ibyiciro bine, birimo Umunyezamu wakuyemo umupira ukomeye (Save), umutoza w’ukwezi, umukinnyi w’ukwezi ndetse n’igitego cy’ukwezi.
Igihembo cy’igitego cy’ukwezi kwa Werurwe na Mata, cyegukanywe na Tuyisenge Arsène wa Rayon Sports.
Ni igitego uyu mukinnyi yatsinze ikipe ya Étoile de l’Est. Cyahigitse icya Muhoza Daniel wa Étoile de l’Est yatsinze Marines FC, icy’umunyezamu, Nicholas Sebwato yatsinze Kiyovu Sports.
Igihembo cy’umunyezamu wakuyemo umupira ukomeye ’Save’, cyegukanywe na Pavelh Ndzila wa APR FC yakoze kuri Rayon Sports. Yahigitse iya Niyongira Patience wa Bugesera FC kuri Rayon Sports n’iya Muhawenayo Gad kuri Kiyovu Sports.
Umutoza w’ukwezi wa Werurwe na Mata, yabaye Imama Imapakabo wa Étoile de l’Est aho yahigitse Guy Bukasa wa AS Kigali, Julien Mette wa Rayon Sports na Thierry Froger wa APR FC.
Igihembo cy’umukinnyi w’ukwezi cyaje kwegukanwa na Gédeon Bendeka wa Etincelles FC. Yagitwaye Tuyisenge Arsène wa Rayon Sports, Gabriel Godspower wa Étoile de l’Est na Hakim Hamiss wa Gasogi United.
- Advertisement -
UMUSEKE.RW
