Ikipe ya APR FC yongeyemo amaraso mashya y’abakinnyi batanu, barimo umunyezamu wazamutse mu ikipe nkuru avuye mu Intare FC.
Ni amakuru yatangajwe n’iyi kipe ku gicamunsi cyo kuri uyu wa Kane, binyuze ku mbuga nkoranyambaga za yo.
Abakinnyi batangajwe ni Tuyisenge Arsène wakiniraga Rayon Sports, Mugiraneza Frodouard wakiniraga Kiyovu Sports, Dushimimana Olivier ‘Muzungu’ wakiniraga Bugesera FC ndetse na Byiringiro Gilbert bari baratije muri Marines FC.
Iyi kipe kandi yazamuye mu ikipe nkuru Kapiteni wa Intare ndetse akaba n’umunyezamu w’ikipe y’Igihugu y’abato, witwa Ruhamyankiko Ivan.
N’ubwo ari bwo bitangajwe na APR FC, abo bose bari bamaze iminsi bakora imyitozo muri Nyamukandagira, cyane ko banifashishijwe mu mukino wo gusogongera kuri Stade Amahoro banganyijemo na Rayon Sports 0-0.
APR FC ikiri ku isoko ry’abakinnyi byavugwaga kandi ko iri mu biganiro n’umunyezamu Muhawenayo Gad wakiniraga Musanze FC ariko byarangiye asinyiye Gorilla FC.
Iyi kipe izakina amarushanwa mpuzamahanga arimo irihuza amakipe yo mu Karere ka Afurika y’i Burasirazuba n’iyo Hagati rizwi nka CECEFA Kagame Cup rizaba tariki ya 6-22 Nyakanga muri Tanzania na Zanzibar ndetse n’irushanwa Nyafurika rihuza amakipe yabaye aya mbere iwayo rya CAF Champions League rizatangira muri Kanama 2024.
ISHIMWE YARAKOZE SETH KEFA/UMUSEKE.RW
