RIB Ifunze Nzizera Aimable usanzwe ari n’umuyobozi wa ‘Rwanda Gospel Stars Live’yatawe muri yombi ,akurikiranyweho ibyaha bibiri birimo gukoresha inyandiko itavugisha ukuri no kwihesha ikintu cy’undi hakoreshejwe uburiganya.
Urwego rw’Igihugu rw’Ubugenzacyaha (RIB) rutangaza ko mu cyumweru gishize tariki 05 Kamena 2024, ari bwo uyu mugabo yatawe muri yombi .
Ibyaha Nzizera Aimable akurikiranweho bifitanye isano n’imitangire y’amasoko ya sosiyete yitwa Amarebe Investiment Ltd akaba yarabikoze mu Ukwakira 2023..
Umuvugizi wa RIB,Dr Muraangira B Thierry avuga ko “Ukora ibyaha wese, akoresha amayeri yose akeka ko atazatahurwa ari beshya. Urwego rw’Ubugenzacyaha RIB rufite Abagenzacyaha bafite ubushake, ubumenyi, ubushobozi ndetse n’ubufatanye n’abaturage bwo gutahura no kugenza ibyaha ababikora bakeka ko bitazamenyekana.”
Guhimba, guhindura inyandiko cyangwa gukoresha inyandiko mpimbano, icyaha giteganwa n’ingingo ya 276 y’Itegeko No 68/2018 ryo kuwa 30/08/2018 riteganya ibyaha n’ibihano muri rusange.
Nzizera aramutse ahamijwe iki cyaha, yahanishwa igifungo kuva ku myaka 5 ariko kitarenze 7 n’ihazabu y’amafaranga y’u Rwanda kuva kuri miliyoni 3,000,000 FRW ariko atarenga 5,000,000 FRW cyangwa kimwe gusa muri ibyo bihano.
Kwihesha ikintu cy’undi hakoreshejwe uburiganya gihanwa n’ingingo ya 174 y’itegeko N0 68/2018 ryo ku wa 30/08/2018 riteganya ibyaha n’ibihano muri rusange.
Ahamijwe iki cyaha, yahanishwa igifungo kuva ku myaka 2 ariko kitarenze 3 n’ihazabu y’amafaranga y’u Rwanda kuva kuri miliyoni 3,000,000 FRW ariko atarenze miliyoni 5,000,000 FRW.
Hashize igihe gito irushanwa rya Gospel Stars Live rihagaze mu buryo bwatunguranye.
- Advertisement -
Ku wa 18 Gicurasi 2024 ni bwo bwo ibikorwa byo gushakisha abanyempano mu turere dutandukanye byagombaga kurangirira mu Mujyi wa Kigali.
Byari byitezwe ko abanyempano bagombaga gutoranywa muri buri Karere bagombaga guhurizwa mu cyiciro cya ’Pre- Selection’ hagatoranywamo 10 bagombaga guhita binjira mu mwiherero.
UMUSEKE.RW
