Igitego cya Victor Mbaoma cyafashije APR FC gutsinda Singida Black Stars mu mikino wayo wa mbere muri CECAFA Kagame Cup 2024.
Ku wa Kabiri tariki ya 9 Nyakanga 2024 ni bwo i Dar es Salaam muri Tanzania hatangiye irushanwa rihuza amakipe yo muri Afurika y’i Burasirazuba n’iyo Hagati (CECAFA Kagame Cup). Ni irushanwa rizasoza tariki ya 21 Nyakanga.
Ikipe y’Ingabo z’Igihugu ni imwe mu makipe 12 ari muri iri rushanwa. Iyi kipe yabashije gutangira neza imbere ya Singida Black Stars yari iri mu rugo, maze iyitsinda igitego 1-0.
Ni igitego cyabonetse hakiri kare mu gice cya mbere, ahagana ku munota wa 22. Cyavuye ku ishoti riremereye ryari ritewe mu izamu na Niyibizi Ramadhan maze umunyezamu Mnata ntiyabasha kugumana umupira; awurekuye usanga rutahizanu Victor Mbaoma ari hafi, awushyira mu nshundura.
Mu gice cya kabiri cy’umukino, Singida Big Stars yaje yariye amavubi ndetse inagerageza uburyo bwinshi bw’ibitego, burimo koruneri umunani n’amashoti umunani yanyuze iruhande rw’izamu, ariko APR FC izibira neza kugeza icyuye amanota atatu.
Umutoza Darko Novic wa APR FC yari yahisemo gukoresha abakinnyi biganjemo abasanzwe muri APR FC yatwaye Igikombe cya Shampiyona ya 2023/24 idatsinzwe, kuko abashya babanje mu kibuga ari Dushimimana Olivier ‘Muzungu’ na Byiringiro Gilbert gusa.
Abakinnyi 11 APR FC yabanje mu kibuga: Pavelh Ndzila, Niyigena Clément, Nshimiyimana Yunusu, Byiringiro Gilbert, Niyomugabo Claude (C), Taddeo Lwanga, Ruboneka Jean Bosco, Niyibizi Ramadhan, Dushimimana Olivier ‘Muzungu’, Mugisha Gilbert na Victor Mbaoma.
Abakinnyi b’abanyamahanga APR FC iheruka kugura bagiye mu kibuga, mu bihe bitandukanye, mu gice cya kabiri basimbuye. Yussif Dauda yasimbuye Mugisha Gilbert, Niyibizi Ramadhan asimburwa na Aliou Souan, naho Victor Mbaoma watsinze igitego asimburwa na Richmond Lamptey. Kwitonda Alain ‘Bacca’ na we yinjiye mu kibuga asimbuye Olivier ‘Muzungu’.
Iyi ntsinzi yatumye Nyamukandagira iyobora itsinda C n’amanota atatu, kuko ikipe ya El Merreikh Bentiu yo muri Sudani y’Epfo na Villa SC ifite igikombe cy’iri rushanwa inshuro eshatu zaguye miswi 0-0, mu mukino wabanje.
- Advertisement -
APR FC izakina umukino wa kabiri mu itsinda ku wa Gatanu tariki ya 12 Nyakanga, ubwo bazaba batana mu mitwe na El Merreikh Bentiu.
ISHIMWE YARAKOZE SETH KEFA/UMUSEKE.RW
