Ikipe ya Rayon Sports yasinyishije amasezerano y’imyaka ibiri myugariro Omar Gningue ukomoka muri Sénégal
Nyuma y’aho Rayon Sports isa n’iri gusoza guhahira ku isoko ry’igura n’igurisha ry’abakinnyi bakina imbere mu gihugu, kuri ubu yatangiye gusinyisha abakinnyi bavuye mu zindi shampiyona zo hanze y’u Rwanda.
Kuri uyu wa Gatanu, tariki ya 5 Nyakanga 2024, ni bwo Murera yahamije ko yasinyishije amasezerano y’imyaka ibiri myugariro wo hagati witwa Omar Gningue
Uretse kuba Gningue yari umukinnyi w’ingenzi mu ikipe ye ya As Pikine yari anabereye kapiteni, uyu musore kandi yari umwe mu bahagaze neza muri shampiyona y’Icyiciro cya Mbere muri Sénégal kuko yanatowe mu ikipe y’umwaka y’abitwaye neza kurusha abandi mu mwaka w’imikino wa 2023/24.
As Pikine yakiniraga yasoreje ku mwanya wa gatanu n’amanota 38 mu mwaka w’imikino ushize. Uretse iyi kipe avuyemo, Gningue kandi yakiniye Sonacos, Ndiambour na Linguère z’iwabo muri Sénégal
Rayon Sports yaguze amasezerano ye muri As Pikine kuko yari amaze igihe gito yongereye amasezerano y’imyaka ibiri.
Muri iyi kipe yambara ubururu n’umweru asanzeyo umunyezamu Khadim N’diaye na we ukomoka muri Sénégal.
Gikundiro ikiri ku isoko ry’abakinnyi n’abatoza, yatangiye imyitozo kuri uyu wa Gatanu, tariki ya 5 Nyakanga 2024 yitegura umwaka w’imikino wa 2024/25.
ISHIMWE YARAKOZE SETH KEFA/UMUSEKE.RW
