Mbere y’uko atangira umwaka w’imikino 2024-25, Uwimana Emmanuel “Djihad” ukina hagati mu kipe ya Gorilla FC, yahize guhamagarwa mu kipe nkuru y’Igihugu, Amavubi nyuma yo guhamagarwa mu y’abato.
Mbere y’uko umwaka w’imikino 2024-25, utangira abakinnyi b’Abanyarwanda batandukanye bakomeje kwitegurana imbaraga, kugira ngo bazabashe kwitwara neza ubwo bazaba bagarutse mu kazi.
Ni muri urwego Uwimana Emmanuel uzwi nka Djihad, yiyemeje kuba mushya muri uyu mwaka w’imikino 2024-25, ndetse agakoresha imbaraga zizatuma abatoza b’Amavubi babasha kumureba ijisho ryoroshye.
Abari hafi y’uyu musore, bahamya ko ari umwe mu bari gukora cyane ngo bazabashe gutanga byinshi muri uyu mwaka. Abaganira na Djihad bavuga ko mu mikino ya gicuti Gorilla FC imaze gukina, uyu musore yayigizemo amanota meza.
Mu mikino itatu ya gicuti iyi kipe imaze gukina, uyu musore w’imyaka 24, yatsinzemo igitego kimwe ndetse anatanga umupira umwe wavuyemo igitego. Ni umwe mu beza bakina hagati Gorilla FC ifite.
Djihad yigeze guhamagarwa mu kipe y’Igihugu y’abato batarengeje imyaka 20. Yaciye kandi mu kipe y’Intare FC yanabereye kapiteni. Ubu ari mu mwaka we wa nyuma w’amasezerano mu kipe ye.
UMUSEKE.RW
