Menya ibivugwa muri Kiyovu mbere yo gutangira shampiyona – AMAFOTO

Mbere y’uko ikipe ebyiri ziterwa inkunga n’Umujyi wa Kigali, Kiyovu Sports na AS Kigali zikina umukino w’umunsi wa mbere wa shampiyona, ikipe yo ku Mumena haravugwamo amakuru arimo abakinnyi beza iyi kipe yamaze kwibikaho.

Ku wa Gatatu tariki ya 21 Kanama 2024, hateganyijwe umukino wari ikirarane, uzahuza Kiyovu Sports na AS Kigali kuri Kigali Péle Stadium Saa cyenda z’amanywa. Ni umukino w’umunsi wa mbere wa shampiyona wagombaga kuba warabaye ku wa Gatanu w’icyumweru gishize ariko urasubikwa biciye mu busabe bwa AS Kigali.

Izi kipe zombi zatangiye imyitozo zitinze bitewe n’ibibazo by’amikoro zagize, byatumye zisoza umwaka w’imikino 2023-24 zifitiye imyenda abakozi barimo abakinnyi, abatoza n’abandi.

Ikipe ya Kiyovu Sports yatakaje abakinnyi batandukanye bari kumwe na yo mu mwaka ushize w’imikino, ariko yagerageje kubasimbuza abandi bari ku rwego rwiza mu rwego rwo kugira ngo iyi kipe kipe itazaba mu zizaherekeza izindi.

Bamwe mu bo yamaze kwibikaho, harimo Sugira Ernest, Hamiss Cédric, Mbirizi Christian, Nsanzimfura Keddy, Ishimwe Kevin, Nshimirimana Jaspin, Jéremie Basiluwa n’abandi barimo abanye-Gabon.

Urucaca kandi rwageregeje kugumana abeza rwari rufite, barimo umunya-Sénégal, Cherif Bayo, Ndizeye Eric, Nzeyurwanda Djihad n’abandi.

Amwe mu makuru avugwamo mbere yo gucakirana na AS Kigali, ni uko abakinnyi bamaze gukorwa mu ntoki n’ubuyobozi. Iyi kipe kandi yamaze kwerekana abakinnyi izifashisha muri uyu mwaka w’imikino. Mu bo yerekanye, harimo Hamiss Cédric uzwi muri Rayon Sports no mu makipe yo ku mugabane w’i Burayi, Nshimirimana Jaspin uzwi mu kipe y’Igihugu y’u Burundi.

Ubuyobozi bw’iyi kipe kandi, bwabanje gukemura ibibazo yari ifite muri FIFA, cyane ko yari yarabujijwe kugura abakinnyi bitewe n’abayireze ko yabirukanye mu buryo bunyuranyije n’amategeko. Ibi bibazo byose, byamaze gushyirwaho akadomo biciye mu kwishyura aba bari barayireze.

Nyuma y’ibi byose, umwuka uturuka mu rwambariro rwa Kiyovu Sports, ugaragaza ko biteguye neza gutangira shampiyona kabone n’ubwo gutangira imyitozo byabanje kuba ingorabahizi.