Urwego rushinzwe gutegura Shampiyona y’Icyiciro cya mbere y’umupira w’amaguru, rwamenyesheje amakipe bireba ko imikino yo kwishyura izatangira mu ntangiriro za Gashyantare 2025.
Ku wa 1 Mutarama 2025, ni bwo hasojwe imikino y’igice kibanza cya shampiyona, yarangiye urutonde ruyobowe na Rayon Sports by’agateganyo n’amanota 36.
Amakipe iyi shampiyona, yamaze kumenyeshwa ko imikino yo kwishyura izatangira tariki ya 7 Gashyantare uyu mwaka. Umwe mu mikino ihanzwe amaso, ni uzakinwa tariki ya 8 Gashyantare 2025 Saa Kumi n’Ebyiri z’Umugoroba kuri Kigali Péle Stadium.
Uyu mukino uzahuza Kiyovu Sports ya nyuma ku rutonde rwa shampiyona n’amanota 12 na APR FC ya kabiri n’amanota 31. Umukino ubanza, ikipe y’Ingabo yari yatsinze iyo ku Mumena ibitego 3-0.
UMUSEKE.RW
