Ambasade ya Leta zunze ubumwe za America i Kinshasa yasohoye itangazo ribuza abaturage b’icyo gihugu gukorra ingendo muri Congo Kinshasa.
Leta zunze ubumwe za America zari zafashe icyemezo cyo gucyura bamwe mu bakozi bayo batari ab’ibingenzi cyane mu mirimo ya Ambasade nyuma yo kubona ko Ambasade zirimo n’iyazo zagabweho ibitero byo gutwika no gusahura mu myigaragambyo yateguwe na Leta ya Congo yo kwamagana ifatwa ry’umujyi wa Goma.
Amahanga arimo u Rwanda n’ibihugu byo mu Burengerazuba bw’Isi nk’Ububiligi, America, Ubufaransa amabasade zabyo zagabweho ibitero.
Itangazo rya Ambasade rivuga ko Congo ifatwa nk’ahantu ari abantu bitwaje intwaro, hari ibyaha, imyigaragambyo, gushimuta abantu cyangwa iterabwoba bityo igasaba abaturage ba America kutajyayo.
America yacyuye abakozi ba Ambasade kubera ibikorwa by’ubujura bwitwaje intwaro, gutera ingo no gusahura, kwica, gufata ku ngufu cyangwa guhohotera abantu, ikavuga ko ibyo bikorwa bimenyerewe kandi Polisi ya Congo idafite uburyo buhagije bwo guhangana na byo no kubikumira.
Itangazo rivuga ko abagizi ba nabi bigira abapolisi cyangwa abashinzwe umutekano. Imitwe yitwaje intwaro, abantu ku giti cyabo n’abasirikare bahora bashyamiranye cyane mu burasirazuba bwa Congo.
Ibyihebe n’imitwe itandukanye yitwaje intwaro yagiye itera abasirikare cyangwa ikagambirira kugirira nabi abaturage b’abasivile, bigashyira mu kaga abakozi b’imiryango itari iya leta.
Ububiligi na bwo bwatanze inama nk’iyi ku baturage babwo, ko batagomba kujya muri Congo kugeza babonye andi mabwiriza.
Gusa ubuyobozi bwa Kinshasa bwahise bubuza indi myigaragambyo, ndetse Polisi ya Congo ku wa Gatatu yiriwe ihangana n’abashaka kwigaragambya.
- Advertisement -
UMUSEKE.RW