Mu gihe hakinwe imikino y’umunsi wa mbere wa shampiyona ya Basketball mu mwaka w’imikino 2024-25, hari ibyo abakunzi b’uyu mukino n’abakunzi ba Siporo muri rusange, bakwitega muri uyu mwaka.
Ku wa Gatanu tariki ya 24 Mutarama 2025, ni bwo hatangiye shampiyona y’icyiciro cya mbere y’uyu mwaka w’imikino 2024-25. Ni imikino yabereye ku bibuga bitandukanye birimo BK Arena, IPRC-Huye n’ahandi.
UMUSEKE wagerageje kwegeranya bimwe mu byo abakunzi ba Basketball bakwitega muri uyu mwaka w’imikino.
- Imikino y’abagore izaba myinshi kurusha iy’abagabo.
Ni ubwa mbere shampiyona izakinwa n’amakipe 11 y’abagore, mu gihe muri basaza ba bo hazitabira amakipe icyenda. Ibi birasobanura ko n’umubare w’imikino y’abagore, uziyongera ukurikije iyo abagabo bazakina.
- APR BBC izakomeza iyoboze inkoni y’icyuma!
Iyo ucishije amaso mu makipe y’abagabo uko yiyubatse, ugakurikiza n’uburyo ikipe ya APR BBC, yiyubatse ndetse yaragumanye abenshi mu beza ba yo, ndetse n’umutoza, bitanga isura y’uko ikipe y’Ingabo izaba ihagaze. Mu mboni z’abasesengura uyu mukino mu Rwanda, APR BBC izakomeza iyoboze inkoni y’icyuma, cyane cyane mu mikino isanzwe ya shampiyona (Regular Season).
- Tigers BBC ihanzwe amaso na benshi!
Imwe mu makipe yiyubatse kandi izaba ihanzwe amaso na benshi muri uyu mwaka w’imikino, ni Tigers BBC. Abayihanze amaso, babiterwa n’uburyo yitwaye ku isoko ry’abakinnyi. Uko yiyubatse, bigaragaza ko Tigers BBC izaba ari ikipe izatanga akazi muri uyu mwaka, cyane cyane ku makipe yitwa ibigugu muri shampiyona. Abayiri hafi, bahamya ko izaba ihatanira umwanya hagati y’uwa gatatu n’uwa kane izaba irwanira na Espoir BBC, Kepler BBC na UGB BBC.
- Amafarashi abiri mu cyiciro cy’Abagore!
Nk’uko byagenze umwaka ushize ndetse ugakurikiza uko amakipe ya APR WBBC na REG WBBC, ubona zombi zizatakaza ari uko zahuye gusa. Abakurikiranira hafi iyi shampiyona, bahamya ko nta yindi kipe izahangara izi kipe zasangiye ibikombe nyuma ya COVID 19.
- Shampiyona y’uyu mwaka izakinwa ahanini n’Abanyarwanda.
Ukurikije ibyo umukino wa Super Coupe werekanye, usanga shampiyona isanzwe (Regular Season), ahanini izakinwa n’abakinnyi b’Abanyarwanda kuruta abanyamahanga. Ikindi cyagaragaye cyabaye nk’icyatunguranye, ni uburyo Sunny wari umutoza wungirije muri Patriots BBC, yagizwe umutoza mukuru kandi byari bimenyerewe ko hazanwa umutoza w’umunyamahanga.
- Henry Mwinuka ahanzwe amaso muri Tigers BBC
Nyuma yo kwegukana ibikombe bitanu bya shampiyona birimo bitatu yahesheje Patriots BBC na bibiri yahesheje REG BBC, Umunya-Tanzania, Henry Mwinuka werekeje gutoza Tigers BBC, ategerejwe na benshi bibaza niba na yo azayifasha gukora izina ikaba yaba ikipe izahangana n’ibigugu birimo APR BBC, REG BBC ndetse na Petriots BBC yatakaje ab’ingenzi.
- Advertisement -
Ndetse birashoboka cyane ko amakipe azaba acunganye ku bakinnyi b’abanyarwanda, noneho mu mikino ya kamarampaka (Playoffs), hakazaba ari bwo hagaragara abakinnyi benshi bakomeye b’abanyamahanga.
UMUSEKE.RW
