Muri GS Muhororo iherereye mu Kagari ka Buhoro, Umurenge wa Ruhango mu Karere ka Ruhango haravugwa ubujura bwa mudasobwa 16 (Computers), Umuyobozi waryo n’Umukozi batangiye kubibazwa.
Ikibazo cy’Ubujura bwa mudasobwa 16 kivugwa muri GS ya Muhororo cyamenyekanye saa ine zo kuri uyu wa gatanu Taliki ya 31 Mutarama 2025.
Amakuru UMUSEKE wahawe na bamwe mu bayafite, avuga ko bamenye ko muri iki Kigo hibwe mudasobwa z’ishuri 16 mu ijoro ryakeye.
Ayo makuru avuga ko babimenyesheje inzego z’Umutekano iz’Ubugenzacyaha n’iza Polisi bihutira kujyayo.
Umwe yagize ati:’Polisi na RIB bahageze bayoberwa uburyo zibwemo kuko butasobanutse’
Ayo makuru avuga kandi ko Ubuyobozi bw’ikigo n’abarinzi bavuga ko hishwe ingufuri y’urugi rw’inyuma, ariko wareba uburyo byakozwemo ugasanga bidashoboka kubera ko iyo ngufuri yari ifungiye imbere.
Abatanze amakuru bavuga ko hari izindi mudasobwa 22 nini ndetse n’izindi ntoya 98 na Projector biri mu cyumba kivugwa ko hibiwe izo zindi uko 16 abo bajura batigeze bajyana.
Bakavuga ko bishoboke ko izo mashini zibwe mu minsi ishize kuko zakuwemo kera, ibi bikaba ari uburyo bwo kujijisha.
Umunyamabanga Nshingwabikorwa w’Umurenge wa Ruhango Kayitare Wellars yabwiye UMUSEKE ko bamenye ko izo mudasobwa zibwe kuva saa mbili za mu gitondo.
- Advertisement -
Gitifu akibaza aho abajura baba banyuze mu gihe hari abazamu ndetse n’Umukozi w’Ikigo ushinzwe imicungire yazo.
Ati:’Reka dutegereze ibiva mu iperereza kuko Inzego z’Ubugenzacyaha zatangiye kubibaza bamwe muri abo bakozi’
Amakuru UMUSEKE ufite aremeza ko usibye abazamu 3 RIB ifite, hari n’Umuyobozi w’Ishuri ndetse n’ushinzwe ikoranabuhanga ubu barimo kubazwa na RIB ibijyanye n’iyibwa ry’izi mudasobwa.
MUHIZI ELISÉE
UMUSEKE.RW/Ruhango.
