Yoon Suk Yeol yabaye Perezida wa mbere wa Koreya y’Epfo uri ku butegetsi utawe muri yombi.
Abategetsi bo muri Koreya y’Epfo bavuze ko ubu Yoon arimo guhatwa ibibazo mu kigo gikora iperereza kuri ruswa kizwi nka CIO (Corruption Investigation Office).
Yavuze ko yemeye guhatwa ibibazo “nubwo ari iperereza rinyuranyije n’amategeko, mu rwego rwo kurinda ko haba imeneka ry’amaraso riteye isoni”.
Depite Park Chan-dae wo mu ishyaka ritavuga rumwe n’ubutegetsi yavuze ko itabwa muri yombi rya Yoon ryemeje ko “ubutabera ni buzima [buriho] muri Koreya y’Epfo”.
Yoon arimo gukorwaho iperereza ku birego byo kwigomeka, nyuma y’igerageza ryamaze igihe gito ryo gushyira igihugu mu mategeko yo mu ntambara mu Kuboza (12) kw’umwaka ushize.
Yoon Suk Yeol yageze ku butegetsi mu mwaka wa 2022.
Abategetsi bashyize mu bikorwa urwandiko rwo kumuta muri yombi, nyuma y’amasaha rwabuze gica hagati yabo, n’itsinda ry’abashinzwe kumucungira umutekano n’abamushyigikiye.
Mu bukonje bwinshi, byabaye ngombwa ko abakora iperereza burira inkuta z’urugo rwe bakoresheje inzego, banakoresha n’ibyuma byo gukata insinga kugira ngo binjire mu rugo rwe.
- Advertisement -
Hari hashize ibyumweru Yoon yaraheze iwe mbere yaho ku itariki ya gatatu y’uku kwezi, abakora iperereza bagerageje kumuta muri yombi ariko birabananira.
Iburanisha mu rubanza ku iyeguzwa rya Yoon, w’imyaka 64, gufata icyemezo ku gukurwa ku butegetsi kwe kwakozwe n’inteko ishingamategeko, ryatangiye ejo ku wa kabiri ariko rirangira mu gihe cy’iminota ine kubera ko ataryitabiriye.
Mu nama y’ishyaka, Depite Park Chan-dae ukuriye abo mu ishyaka ritavuga rumwe n’ubutegetsi rya ‘Democratic Party’ bo mu nteko ishingamategeko, yavuze ko iryo tabwa muri yombi “ni intambwe ya mbere yerekeza ku gusubizaho ubutegetsi bwubahiriza itegekonshinga, demokarasi n’ubutegetsi bwubahiriza amategeko”.
Kuva Yoon yagerageza gushyira igihugu mu mategeko yo mu ntambara bikamunanira mu kwezi gushize, abadepite batavuga rumwe n’ubutegetsi bise Yoon n’abamushyigikiye “abigometsi”, ndetse bakomeje gusaba ko bakurwa ku butegetsi bakanatabwa muri yombi.
Abo badepite bamaze gushobora kweguza Yoon n’abategetsi bo ku rwego rwo hejuru bo mu butegetsi bwe, barimo Perezida w’agateganyo Han Duck-soo.
Ibitangazamakuru byo muri Koreya y’Epfo byatangaje ko abadepite bo mu ishyaka PPP (People Power Party) rya Yoon riri ku butegetsi, bamaganye itabwa muri yombi rye bavuga ko “rinyuranyije n’amategeko”.
Abo mu ishyaka PPP bari mu bantu bari bateraniye hanze y’urugo rwa Yoon mu gitondo cyo kuri uyu wa gatatu kugira ngo babuze abakora iperereza kumuta muri yombi.
Kweon Seong-dong, ukuriye abadepite b’ishyaka PPP mu nteko, yabwiye inteko ishingamategeko ko ababajwe n’ukuntu ibintu byagenze.
Yagize ati”Agaciro [icyubahiro] k’igihugu cyacu kangijwe.”
Kweon yongeyeho ko gukomereka kw’umuturage kwabaye mu bushyamirane n’abategetsi, bazakuryoza abakora iperereza n’abapolisi.
Mu butumwa bwa videwo bwari bwafashwe mbere bwatangajwe muri iki gitondo n’abajyanama ba Yoon, uyu Perezida wahagaritswe ku butegetsi yavuze ko yaretse guhangana n’amagerageza yo kumuta muri yombi y’abakora iperereza, kugira ngo arinde ko ibintu bifata indi ntera irimo urugomo.
Ariko yashimangiye ko itabwa muri yombi rye rinyuranyije n’amategeko.
Yoon yagize ati”Uyu munsi, ubwo nababonaga bateye agace ntarengwa k’umutekano bafite ibikoresho byo kuzimya umuriro, nafashe icyemezo cyo kwitaba imbere ya CIO [ikigo gikora iperereza kuri ruswa], nubwo ari iperereza rinyuranyije n’amategeko, mu rwego rwo kurinda ko haba imeneka ry’amaraso riteye ishozi”.
Kuva abakora iperereza bamara kumuta muri yombi, igihe cyatangiye kubashirana.
Bashobora kugumana Yoon mu gihe kitarenze amasaha 48, cyangwa bakabona urwandiko rwo kumufunga muri iki gihe, kugira ngo bamufunge mu gihe akomeje gukorwaho iperereza.
Mu gihe urukiko rwakwanga gutanga urundi rwandiko, Yoon azarekurwa.
Yoon ashobora kubazwa, ariko afite uburenganzira bwo guceceka ntagire icyo asubiza.
Yoon, wamaganye iri tabwa muri yombi avuga ko rinyuranyije n’amategeko, birashoboka ko yakoresha ubwo burenganzira.
Niharamuka hatanzwe urwandiko rwo kumufunga , rugomba kwemezwa n’urukiko, Yoon azafungwa anabazwe mu gihe cy’iminsi ishobora kugera kuri 20 mbere yuko agezwa mu rubanza.
Amaze gushyirirwaho ibirego, abashinjacyaha bashobora gusaba ko Yoon aburanishwa afunze, igifungo gishobora kumara amezi ageze kuri atandatu.
IVOMO: BBC
UMUSEKE.RW
