Ubushinjacyaha mu rubanza ruregwamo Béatrice Munyenyezi bwavuze ko abunganira Béatrice Munyenyezi mu mategeko aribo Me Bruce Bikotwa na Gashema Felecien bakurikiranwa n’inkiko.
Kuri uyu wa 28 Mutarama 2025 ubushinjacyaha bwahawe umwanya ngo buvuge ku mpamvu zatumye uruhande rwa Béatrice Munyenyezi rujurira igihano cy’igifungo cya burundu yakatiwe n’urukiko rwisumbuye rwa Huye.
Ubushinjacyaha bwavuze ko Béatrice Munyenyezi yishe umubikira amurashe ndetse anatanga amabwiriza hicwa umututsi witwa Aimable aho Munyenyezi Béatrice yarabihayemo amabwiriza Kazungu ngo yice Aimable.
Uhagarariye ubushinjacyaha ati”Twatunguwe no kumva aho abunganizi ba Béatrice Munyenyezi bavuze ko uyu mubikira na Aimable batabayeho ari baringa.”
Uhagarariye ubushinjacyaha yakomeje avuga ko abatanze ubuhamya banakoze jenoside n’ibyaha bikabahama batanze ubuhamya ko izo nzirakarengane arizo Aimable n’uwo mubikira bishwe ndetse hari n’abarokotse jenoside bemeza ko bishwe.
Uhagarariye ubushinjacyaha ati”Kuba abunganira Munyenyezi Béatrice bemeza ko ziriya nzirakarengane ari baringa twe twabibonyemo nko gushinyagura kandi ababikoze bagiye bajyanwa mu nkiko”
Ubushinjacyaha bwavuze ko kuba abunganira Béatrice Munyenyezi nk’abanyamwuga batari bakwiye gushinyagura kandi kuba barabikoze bakwiye kubibazwa.
Urukiko rwahise rubwira ubushinjacyaha ko niba abaregwa baremeje ko abo bantu batabayeho ari uburyo bwabo bw’imiburanire ahubwo ubushinjacyaha nabwo bufite uburenganzira bwo kugaragaza uko abo bantu babayeho bityo uburyo bw’imiburanire ari uburenganzira bwa buri wese.
Ubushinjacyaha buvuga iki kuba aburana avuga ko azira umuryango yashatsemo?
- Advertisement -
Ubushinjacyaha bwavuze ko ibyo Béatrice Munyenyezi yireguza bidakwiye guhabwa ishingiro kuko harebwa ibyo buri wese aregwa aho umugabo wa Béatrice Munyenyezi witwa Arsene Shalom Ntahobari na nyirabukwe Pauline Nyiramasuhuko barezwe ibyabo.
Ubushinjacyaha bwavuze ko ababaga kwa Sebukwe wa Béatrice Munyenyezi witwa Maurice Ntahobari bose batakurikiranyweho ibyaha bya Jenoside.
Uhagarariye ubushinjacyaha ati”Ababaga kwa Maurice Ntahobari bose ntibakuriranyweho ibyaha kuko uretse Munyenyezi hanabaga baramukazi be, habaga abaje gushinjura Béatrice Munyenyezi n’abandi ntibakurikiranwe.”
Ubushinjacyaha bwavuze ko baramukazi ba Béatrice Munyenyezi aribo Denyse Ntahobari, Clarisse Ntahobari, Brigitte Ntahobari bo batakurikiranweho ibyaha bya jenoside.
Ubushinjacyaha bwakomeje buvuga ko umushinjacyaha mukuru yasohoye itangazo ry’abantu bari hanze bashakishwa ngo bakurikiranyweho ibyaha bya jenoside uwitwa Maurice Ntahobari akaba Sebukwe wa Béatrice Munyenyezi atari kuri urwo rutonde.
Uhagarariye ubushinjacyaha ati”Niba Munyenyezi Béatrice avuga ko azira umuryango yashatsemo ni gute umukazana yari gukurikiranwa maze sebukwe ari nawe mukuru w’umuryango we atari gukurikiranwa?”
Ubushinjacyaha buravuga ko Béatrice Munyenyezi yakomeza gufungwa burundu nkuko urukiko rwisumbuye rwa Huye rwabyemeje.
Béatrice Munyenyezi uregwa none yahamijwe ibyaha bya jenoside n’urukiko rwisumbuye rwa Huye ari mu bujurire mu rugereko rwihariye rushinzwe kuburanisha ibyaha mpuzamahanga n’ibyambukiranya imipaka ruri i Nyanza mu ntara y’Amajyepfo y’u Rwanda.
Ni umukazana wa Pauline Nyiramasuhuko wari Minisitiri w’umuryango kuri Leta y’Abatabazi akaba umugore wa Arsene Shalom Ntahobari, ari umugabo we ari Nyirabukwe bose bahamijwe ibyaha bya jenoside bakatirwa igihano cy’igifungo cya burundu.
Niba nta gihindutse uru rubanza ruzakomeza tariki ya 25 Gashyantare 2025.
Theogene NSHIMIYIMANA
UMUSEKE.RW