Bamwe mu bakunzi b’ikipe y’Ingabo, bageneye agahimbazamusyi ikipe ya Kiyovu Sports n’ubwo bayitsinze ibitego 2-1 mu mukino w’umunsi wa 16 wa shampiyona.
Ku wa 8 Gashyantare 2025, ni bwo habaye umukino w’umunsi wa 16 wa shampiyona, wahuje Kiyovu Sports na APR FC. Ni umukino warangiye, ikipe y’Ingabo ibonye amanota atatu nyuma yo gutsinda iyo ku Mumena ibitego 2-1.
N’ubwo Urucaca rwatsinzwe, abakurikiye uyu mukino, babonye kandi bahamanya n’imitima ya bo ko ari ikipe yahindutse muri iyi mikino yo kwishyura ndetse itandukanye cyane n’iyakinnye imikino ibanza ya shampiyona.
Amakuru yizewe UMUSEKE wamenye, ni uko nyuma y’uyu mukino, hari abafana babiri ba APR FC, bageneye agahimbazamusyi abakinnyi ba Kiyovu Sports. Umwe muri aba bafana, yatanze ibihumbi 900 Frw undi atanga ibihumbi 100 Frw. Amakuru avuga ko babinyujije kuri umwe mu baba hafi cyane y’abakinnyi.
Gutanga aya mafaranga ngo ahabwa abakinnyi b’iyi kipe yambara icyatsi n’umweru, byatewe n’uko aba bafana bishimiye umukino mwiza ikipe yerekanye n’ubwo byarangiye itakaje amanota.
Kubona aya manota, byatumye ikipe y’Ingabo igumana umwanya wa Kabiri n’amanota 34 mu gihe Urucaca rukiri ku mwanya wa nyuma n’amanota 12 n’umwe w’ibitego 17.
UMUSEKE.RW
