Kizza Besigye, umunyapolitiki utavuga rumwe n’ubutegetsi bwa Yoweri Kaguta Museveni wa Uganda, ari mu myigaragambyo yo kwisonzesha aho afungiwe muri Gereza ya Luzira Maximum Security Prison i Kampala.
Abajyanama ba Besigye bamaganye gukomeza gufungwa mu gihe Urukiko Rukuru rwa Uganda mu kwezi gushize rwafashe icyemezo cyo kubuza inkiko za gisirikare gucira imanza abasivile.
Harold Kaija, umujyanama wa Besigye mu bya politiki mu ishyaka rye rya People’s Front for Freedom (PFF), yemeje iyi myigaragambyo yo kwisonzesha.
Kaija yabwiye BBC ko yatangiye iyi myigaragambyo kugira ngo asohorwe muri gereza kuko akwiriye kuba ari iwe mu rugo.
Yagize ati: ‘Yego, ni byo, yatangiye imyigaragambyo yo kwisonzesha.’
Avuga kandi ko ishyaka rya PFF riri gukorana n’inzego zibishinzwe kugira ngo Besigye arekurwe.
Besigye, umunyapolitiki yahoze ari umuganga bwite wa Perezida Yoweri Museveni, yafashwe mu Ugushyingo 2024 i Nairobi muri Kenya ari kumwe n’umujyanama we mu bya politiki, Obeid Lutale.
Nyuma, aba bombi bagejejwe imbere y’urukiko rwa gisirikare i Kampala, bashinjwa gutunga intwaro mu buryo butemewe n’amategeko, ibirego bahakana.
Mu rubanza rwatunguranye muri Mutarama 2025, Urukiko Rukuru rwa Uganda rwatangaje ko bitemewe n’itegeko nshinga ko inkiko za gisirikare ziburanisha abasivili.
Iki cyemezo cyarakaje Perezida Museveni, aracyamagana avuga ko ari ‘icyemezo kibi’, arahira ko azakirwanya.
Besigye amaze kwiyamamaza mu matora y’umukuru w’igihugu inshuro enye, mu 2001, 2006, 2011, na 2016, aho yahatanye na Perezida Museveni, ariko atsindwa.
Mu matora ya 2021, yahisemo kutiyamamaza avuga ko amatora yose ateguwe ku butegetsi bwa Perezida Museveni yibwa.
NDEKEZI JOHNSON / UMUSEKE.RW
