Muhanga: Itsinda ry’abadepite mu nteko ishingamategeko bagiriye inama Inzego zitandukanye z’Akarere yo gushyira mu nyandiko ibibazo byose bivugwa mu bucukuzi bw’amabuye y’agaciro butemewe ndetse n’ababitera bikamenyeshwa Inzego nkuru z’Igihugu.
Babivugiye mu nama yabahuje n’Ubuyobozi bw’Akarere yabaye ku mugoroba wo kuri uyu wa gatatu Taliki ya 28 Gicurasi 2025.
Hon Nabahire Anastase na bagenzi be bagiriye Ubuyobozi bw’Akarere ka Muhanga n’Inzego z’Umutekano ko zisesengura ibibazo biri mu bucukuzi bw’amabuye y’agaciro butemewe n’ababitera kubishyira mu nyandiko maze zigahabwa Inzego nkuru z’Igihugu.
Iyi nama bayigiriwe nyuma yuko Ubuyobozi bw’Akarere ka Muhanga bugaragarije abadepite umutekano mucye uboneka mu bucukuzi bw’amabuye y’agaciro butemewe kuko ababukora bahasiga ubuzima bakangiza n’ibidukikije.
Meya w’Akarere ka Muhanga Kayitare Jacqueline yabwiye aba badepite ko iki kibazo cy’ubucukuzi bw’amabuye y’agaciro butemewe kibahangayikishije kubera ko ubuyobozi bw’Akarere budashinzwe gutanga impushya z’ahemewe gucukurwa ayo mabuye y’agaciro cyangwa se kuzambura abatabyuharije ibi bikaba bifitwe mu nshingano n’Ikigo cy’Igihugu Gishinzwe Mine, Peteroli na Gaz ( RMB).
Ati”Mu Mirenge 12 igize Akarere cumi nimwe muriyo ibonekamo amabuye y’agaciro, ahakorerwa ubwo bucukuzi ntabwo aritwe dushinzwe kuhagenzura kuko tudatanga ibyangombwa.”
Umuyobozi wa Polisi mu Karere ka Muhanga SSP Jean de Dieu Mayira avuga ko benshi mu bakora ubwo bucukuzi bw’amabuye y’agaciro butemewe iyo bafashwe bababwira ko aho bacukura ari mu masambu yabo.
Ati”Iki ni ikibazo gihangayikishije Inzego zitandukanye mudufashe gukora Ubuvugizi.”
Depite Nabahire Anastase uyoboye itsinda ry’Abadepite yabwiye izi Nzego ko ibyo zivuga bifite ishingiro ariko ko nta hantu byanditse ku buryo abashaka kubikemura babishakira.
Hon Nabahire avuga ko muri iyo nyandiko bazerekana uko ibyo bibazo biteye abatuma bikomeza kubaho maze bakabiha Inzego zibakuriye uhereye ku buyobozi bw’Intara ukageza ku nzego nkuru z’igihugu.
Depite Nabahire avuga ko amarira bakunze kuririra mu nama akwiriye kujya mu nyandiko kugira ngo ikibazo kimenyekane haba mu nzego zifite ubucukuzi mu nshingano ndetse n’izindi nzego nkuru z’Igihugu.
Ati”Kumvikanisha iki kibazo mu buyobozi bwo hejuru ntabwo bireba Akarere kamwe gusa ahubwo bigomba gukorwa no mu tundi turere ducukurwamo amabuye y’agaciro .”
Depite Nabahire yashimye raporo Akarere kabagejejeho irebana n’inama bagenzi be bakoreye ingendo muri aka Karere basiga babahaye ibibazo by’abaturage bagomba gukemura, ubu bakaba basanze ibyinshi muri byo byarakemutse.
Muri uru rugendo, Abadepite barateganya gusura ibikorwa by’ahatangirwa serivisi no gukorana Inama n’abaturage.
MUHIZI ELISÉE
UMUSEKE.RW/MUHANGA
