Inzego z’umutekano z’u Rwanda, ziri Mozambique, ku wa Gatandatu tariki ya 24 Gicurasi 2025, zifatanyije n’abaturage bo mu gace ka Mucojo mu Karere ka Macomia Intara ya Cabo Delgado, mu gikorwa cy’Umuganda Rusange.
Abagiza Inzego z’umutekano z’u Rwanda (RSF) bari mu butumwa bwo kurwanya iterabwoba muri iyo Ntara, bafatanyije n’abaturage gusukura isoko rya Mucojo n’inkengero zaryo.
Umuyobozi w’agace ka Mucojo Hassan Fazenda, yashimiye abagize Ingabo na Polisi by’u Rwanda, imbaraga bakoresha ngo babohore aka gace kakunze kwibasirwa n’ibikorwa by’iterabwoba.
Hassan Fazenda yagize ati“Turabashimira ubwitange mwagaragaje, ngo dusubire mu ngo zacu. Ubufasha bwanyu buri gutuma tuva mu ngaruka zikomeye twabayemo mu myaka ine ishize.”
Lt Col Andrew Mugabo, wavuze mu izina ry’Inzego z’umutekano z’u Rwanda, na we yashimye abaturage n’abayobozi b’inzego z’ibanze ku ku muhate wabo wo kurwanya ibikorwa by’iterabwoba.
Yashimangiye ko u Rwanda rutazatezuka ku butumwa rwiyemeje gutangaho ubufasha, by’umwihariko mu bikorwa bigamije kugarura imibereho myiza n’umutekano urambye mu Karere.
Aka gace kakozwemo Umuganda kari karahindutse ubwihisho bw’ibyihebe kugeza mu kwezi k’Ukwakira 2024, ubwo habohorwaga n’Inzego z’umutekano z’u Rwanda.
IVOMO: MOD
UMUSEKE.RW
