Tombola y’ijonjora rya nyuma mu mikino ya CAF Confederations Cup hashakwa amakipe ajya mu matsinda, isize APR FC igomba gusubira mu bihugu by’Abarabu, aho izakina na RS Berkane yo muri Maroc.
Nyuma yo gukurwamo na Etoile du Sahel iyinyagiye 5-1 mu mikino ibiri muri CAF Champions League, APR FC yahise ikomereza urugendo mu mikino ya CAF Confederations Cup.
Kuri uyu wa Kabiri ni bwo tombola yabereye ku cyicaro gikuru cya CAF i Cairo mu Misiri yagaragaje ikipe izakina na APR FC.
Amakipe 16 yamanutse avuye muri Champions League yagombaga gutombarana na 16 yasigaye muri Confederation Cup. Ikipe izatsinda muri iki cyiciro igomba guhita ijya mu matsinda ya CAF Confederations Cup.
Amakipe yari agabanyije mu dukangara tune, agakangara ka mbere karimo TP Mazembe, Simba SC, Zanaco FC, ASEC Mimosa, FC Nouadhibou, AS Otoho d’Oyo na Rivers United.
Agakangara ka 2 karimo; Gor Mahia, Marumo Gallants, JS Saoura, Red Arrows FC, DCMP, Al Ahli Tripoli/Biashara United, GD Interclube na Binga FC.
Agakangara ka 3 karimo; Tusker FC, Royal Leopards, APR FC, US Gendarmerie, LPRC Oilers, AS Maniema Union, Al Ittihad SC, Stade Malien na Hearts of Oak.
Agakangara ka 4 karimo; RS Berkane, Pyramids, JS Kabylie, Enyimba, CS Sfaxien, Cotons Sports FC, Orlando Piretse na Al Masry.
Amakipe yo mu gakangara ka mbere yatomboye ayo mu gakangara ka kabiri n’aho mu gakangara ka gatatu batombora ayo mu gakangara ka kane.
- Advertisement -
APR FC yo mu Rwanda yaje gutombora RS Berkane yo muri Maroc.
Umukino ubanza uteganyijwe kuzabera mu Rwanda hagati ya tariki ya 26 n’iya 28 Ugushyingo, 2021 mu gihe uwo kwishyura uzabera muri Maroc hagati ya tariki ya 3 n’iya 5 Ukuboza, 2021.
Ukeneye kwamamaza! Gusobanuza! Gutanga amakuru? Hamagara 0788772818
UMUSEKE.RW
