Kigali: Polisi yerekanye abashoferi 19 bafashwe batwaye ibinyabiziga banyoye inzoga

Polisi y’Igihugu kuwa Kane tariki ya 9 Ukuboza 2021, yerekanye abashoferi 19 bafashwe bakekwaho gutwara ibinyabiziga banyoye inzoga.

Aba bose uko ari 19 bafatiwe mu bice bitandukanye byo mu Mujyi wa Kigali .Aba bafashwe ku matariki ya 5 kugeza ku ya 8 Ukuboza 2021.

Umwe mu bafashwe witwa Ndayiyeze Nepomuscene, yavuze ko yafashwe tariki ya 6 Ukuboza 2021 mu Karere ka Nyarugenge mu Murenge wa Nyarugenge mu Kagari ka Rwampala, afatwa yanyoye inzoga.

Yagize ati “Bamafashe ku isaha ya saa tanu z’ijoro ntwaye moto nanyoye, Abapolisi barapimye basanga mfite ibipimo biri hejuru by’umusemburo wa alcohol.Amakosa narayakoze kandi ndayasabira imbabazi.”

Undi nawe witwa Haeninama Xavier yiyemerera ko yafashwe yanyoye ibisindisha ku rwego rwo hejuru kuko ibipimo byagaragaje ko afite umusemburo wa alcohol ungana na 7.

Yagize ati “Kuwa Kabiri tariki ya 7 Ukuboza 2021 natwaye umugenzi mu bice bya Kanombe ngezeyo ampa inzoga yitwa Waragi.Narayinyoye , nibagirwa ko ntwaye moto,mu kugaruka ngeze nyabugogo baramfata, bapimye basanga mfite igipimo cya 7 n’ibice.”

Aba bombi bemera ko bakoze amakosa ndetse bakemera kuyasabira imbabazi kandi ko bibasigira igihombo giterwa no gucibwa amande ndetse n’igifungo cy’iminsi itanu, bakagira inama bagenzi babo kwirinda gutwara banyoye.

Umuvugizi wa Polisi y’Igihugu ushinzwe ishami ry’umutekano wo mu muhanda SSP Rene Irere, yibukije abatwara ibinyabiziga ko bagomba kuzirikana ku ubuzima bwabo n’ubw’abandi birinda icyateza impanuka.

Yavuze ko abatazajya babyubahiriza bazajya bafatwa babihanirwe kuko “Polisi ntizahagarika ibikorwa byo kurwanya ikintu cyose cyateza umutekano mucye wo mu muhanda.”

IVOMO : RNP

TUYISHIMIRE RAYMOND / UMUSEKE.RW