Impuzamashyirahamwe y’Umupira w’Amaguru ku mugabane wa Afurika, CAF, yashyize Tumutoneshe Diane muri Komisiyo ishinzwe gutegura umupira w’abagore ku mugabane wa Afurika.
Ku wa Gatatu tariki 20 Mata 2022, biciye ku Munyamabanga Mukuru w’Impuzamashyirahamwe y’Umupira w’Amaguru muri Afurika, CAF, Véron Masengo-Omba, yandikiye Komiseri Ushinzwe Umupira w’abagore mu Ishyirahamwe Nyarwanda ry’Umupira w’Amaguru, Ferwafa, Tumutoneshe Diane, amumenyesha ko yagizwe umwe mu bagize Komite Ishinzwe gutegura umupira w’abagore muri Afurika.
Tumutoneshe asanze undi Munyarwanda wari usanzwe muri iyi Komite, Uwamahoro Tharcille Latifah wigeze kuba Umunyamabanga Mukuru wa Ferwafa.
Iyi Komite isanzwe iyoborwa n’Umunya-Comores, Kanizat Ibrahim, wungirijwe n’Umunya-Sierra Leone, Isha Johansen yasimbuye kuri uyu mwanya.
Tumutoneshe aherereye ku mugabane w’i Burayi, aho yagiye kwiga “FIFA Masters Course” mu gihugu cy’u Bwongereza muri Leicester University, mu Butaliyani (SDA Bacconi School Of Management), no mu Busuwisi muri Neuchâtel University iherereye i Zurich.
Uyu mugore wize ibijyanye na Siporo, asanzwe ari n’Umuyobozi w’Irerero rya Dream Team Academy yashinzwe na Kayisire Jacques usanzwe ari Visi Perezida wa Mbere wa Rayon Sports.
Mu 2019, Tumutoneshe yize muri Kaminuza ya Leipzig mu Budage ibijyanye n’imicungire ya Siporo (Sports Management).
HABIMANA SADI/UMUSEKE.RW
