Si kenshi abakinnyi ba ruhago mu Rwanda bagaragaza abakunzi babo mu ruhame, ariko abakobwa bakundana nabo bishimira kubishyira hanze.
Uramutse ukurikira Umutoniwase Nadia na Niyomugabo Claude ukinira APR FC, uhita wiha igisubizo kigaragaza urukundo aba bombi bakundana.
Uyu mukobwa witabiriye Miss Rwanda 2020 ahagarariye Intara y’Amajyepfo, we yiyemerera ko mu Rwanda umukinnyi yemera ari Niyomugabo, mu gihe hanze y’u Rwanda yemera umunyezamu wa Chelsea, Édouard Mendy.
Umutoniwase kenshi kuri konti ye ya Instagram ntabwo ajya ahisha amarangamutima ye kuri uyu myugariro w’ibumoso, kuko agaragaza amafoto y’ibihe byiza aba bombi iyo basohokanye.
Mu bo Claude akurikira kuri Instagram, uretse kuba habanza ikipe ye APR FC, undi uza mu b’imbere ni uyu mukunzi we.
Inshuti z’aba bombi zihamya ko basohokana kenshi iyo hatari akazi kazitira uyu myugariro cyangwa hatari ishuri rizitira Umutoniwase.
Niyomugabo Claude yageze muri APR FC avuye muri AS Kigali FC, ndetse anahamagarwa mu ikipe y’Igihugu y’u Rwanda, Amavubi, mu gihe Umutoniwase Nadia ari umunyeshuri wiga Itangazamakuru muri Kaminuza y’u Rwanda.
UMUSEKE.RW
