Ubuyobozi bw’ikipe ya APR Women Basketball Club, bwatangaje ko bwongereye amasezerano abakinnyi batandatu barimo Imanizabayo Marie Laurence [Zede] na Nsanzabaganwa Nelly Sandra na Umugwaneza Charlotte usanzwe ari kapiteni wa yo.
Mbere y’uko umwaka w’imikino 2022/2023 utangira mu mukino wa Basketball, amakipe akina shampiyona mu cyiciro cya Mbere mu bagabo n’abagore, akomeje kwiyubaka.
Igezweho, ni ikipe ya APR Women Basketball Club yahisemo kugumana abakinnyi beza ba yo. Iyi kipe y’Ingabo yongereye amasezerano y’umwaka umwe, abakinnyi batandatu barimo Umugwaneza Charlotte, Umuhoza Odette Jordan, Uwizeye Assouma Mugisha Uwera Bégnine, Imanizabayo Marie Laurence [Zede] na Nsanzabaganwa Nelly Sandra.
Iyi kipe yaherukaga kongera kwibikaho Kantore Sandra uzwi nka Dumi wavuye muri REG WBBC, agasinya amasezerano y’imyaka ibiri muri iyi kipe y’Ingabo.
APR WBBC izatangira shampiyona yakira UR Busogo WBBC tariki 21 Mutarama 2023, ari na bwo umwaka w’imikino uzatangira muri Basketball y’abagore, mu gihe mu bagabo umwaka w’imikino uzatangira tariki 13 Mutarama 2023.
UMUSEKE.RW
