Umuyobozi w’Umuryango wa Kiyovu Sports, Ndorimana Jean François Regis uzwi nka Général, yibukije abatega iminsi iyi kipe ko bazi neza imbaraga bibasaba kugira ngo begukane igikombe cya shampiyona.
Kugeza ku munsi wa 28 wa shampiyona y’icyiciro cya Mbere muri ruhago y’u Rwanda, ikipe ya Kiyovu Sports iyoboye urutonde rwa shampiyona by’agateganyo n’amanota 60.
N’ubwo iyi kipe yo ku Mumena iyoboje inkoni y’icyuma ariko, abakeba bakomeje kuyitega iminsi bavuga ko iki gikombe cya shampiyona ntacyo izegukana.
Perezida wa yo, Ndorimana Jean François Regis uzwi nka Général aganira na UMUSEKE, yibukije abatega iminsi iyi kipe ko ihagaze bwuma kandi urugamba rwo gushaka igikombe rukomeje.
Ati “Abadutega erega na bo ni abantu. Baradutega ariko tugomba gutambuka neza. Abo badutega reka mbabwire ko icyo twe tureba ni imikino ibiri isigaye kuko yose tuzayifata nka final kuri twe.”
Abajijwe ku cyihishe inyuma yo kuba ikipe abereye umuyobozi ikomeje kwitwara neza ndetse no kwegukana igikombe cya shampiyona bishoboka, Ndorimana yasubije ko agahimbazamusyi k’abakinnyi kazamuwe kandi umuryango wa Kiyovu muri rusange ushyize hamwe.
Ati “Ubu abakinnyi bageze ku gahimbazamusyi k’ibihumbi 170 Frw buri umwe ku mukino batsinze. Ikirenze kuri ibyo, ubu gutsinda igitego kwabo hahita hiyongeraho ibihumbi 600 Frw. Ni yo batsinda 10 ubwo ni miliyoni 6 Frw bahita bahabwa bakayabagana. Uretse ibyo kandi, dushyize hamwe kutumeneramo bizavuna benshi rwose.”
Urucaca rusigaje imikino ibiri ya Sunrise FC i Nyagatare na Rutsiro FC bazasoza bakirira kuri Stade ya Muhanga cyangwa kuri Kigali Péle Stadium. Iyi kipe kuko irusha amanota atatu APR FC iyikurikiye, irasabwa kubona amanota ane muri atandatu azakinirwa ubundi ikegukana igikombe iheruka mu myaka hafi 30 ishize.
UMUSEKE.RW
