Mu buryo bugoranye, ibifashijwemo na rutahizamu Victor Mbaoma, ikipe ya APR FC yabonye amanota atatu y’umunsi wa Gatandatu wa shampiyona.
Ikipe y’Ingabo yari yakoze impinduka zigera kuri eshanu, zirimo Nshimiyimana Yunussu, Niyigena Clément, Ishimwe Christian, Mugisha Gilbert na Kwitonda Alain Bacca. Aba bose bari basimbuwe na Ndikumana Danny, Apam Asongwe Bemol, Salom Banga Bindjeme, Niyomugabo Claude na Buregeya Prince.
Uyu mukino wabereye kuri Kigali Pelé Stadium, watangiye Saa kumi n’ebyiri z’umugoroba, witabirwa n’abafana baringaniye b’ikipe y’Ingabo ndetse na bake bari baturutse i Huye baje gushyigikira ikipe ya Mukura VS.
Ikipe iterwa inkunga n’Akarere ka Huye, yari ihagaze neza ndetse bigatuma APR FC igorwa no kugera ku izamu rya yo.
Wari umukino wihutaga ku mpande zombi, ndetse warimo amayeri menshi byatumaga abakina mu ku mpande mu gice cy’ubusatirizi ku makipe yombi, batidagadura uko babyifuza.
Nyuma yo gukomeza gucungana, iminota 45 y’igice cya Mbere, yarangiye amakipe nta yibashije kureba mu izamu ry’indi.
Mu gice cya Kabiri, ikipe y’Ingabo yakomeje kugaragaza inyota yo kubona igitego, ndetse bituma ihita inakora impinduka ikuramo Ndikumana Danny na Apam Assongwe Bemol, basimbuwe na Mugisha Gilbert na Kwitonda Alain Bacca basabwaga gufasha ikipe ya bo mu gice cy’ubusatirizi.
Izi mpinduka zatumye ikipe ya APR FC itangira kwitutisha imipira igana mu gice cy’ubusatirizi.
Byakomeje kugorana ku kipe y’Ingabo, ariko mu gihe hari hamanitswe iminota itanu y’inyongera, rutahizamu Victor Mbaoma yahise atsinda igitego ku mupira wari wabanje guhanwa maze ugera kwa Ombolenga Fitina maze Mboama ahita awutsinda neza.
- Advertisement -
Umukino warangiye APR FC ibonye amonota atatu yuzuye y’umunsi wa Gatandatu wa shampiyona.
Ibi byatumye ikipe y’Ingabo ihita yuzuza amanota 13 ihita inafata umwanya wa Mbere imbere ya Musanze FC ifite amanota 13.
Indi mikino y’umunsi wa Gatandatu, izakomeza ku wa Gatandatu tariki ya 14 no ku Cyumweru tariki ya 15 Ukwakira.
Abakinnyi babanjemo ku mpande zombi:
APR FC XI: Pavelh Ndzila, Ombolenga Fitina, Niyomugabo Claude, Buregeya Prince, Salom Banga Bindjeme, Taddeo Lwanga, Niyibizi Ramadhan, Ruboneka Bosco, Ndikumana Danny, Apam Assongwe, Victor Mbaoma
Mukura VS XI: Ssebwato Nicolas, Ngirimana Alex, Kayumba Soter, Muvandimwe JMV, Kubwimana Cédric, Ntarindwa Aimable, Ndayogeje Gérard, Ssebaduka Djuma, Iradukunda Élie Tatou, Uwiduhaye Aboubacar, Nsabimana Emmanuel.
HABIMANA SADI/UMUSEKE.RW
