Ikipe ya Nyanza Football Club yatangiye itanga ubutumwa bwo kuzitwara neza mu cyiciro cya Kabiri ubwo yatsindaga ikipe ya Tsinda Batsinde ibitego 2-0 mu mukino ufungura Shampiyona umwaka w’imikino 2023-2024.
Kuri uyu wa Gatandatu tariki O4 Ugushyingo 2023, nibwo ku mugaragaro hatangiye icyiciro cya Kabiri mu mupira w’amaguru mu Rwanda.
Kuri Stade ya Nyanza haberaga umukino wo mu itsinda A wahuzaga ikipe ya Nyanza Football Club yakinaga na Tsinda Batsinde FC yazamutse uyu mwaka mu cyiciro cya Kabiri.
Nyanza FC yari imbere y’abafana bayo bari bakumbuye kubona iyi kipe yabo, nayo ntiyabatengushye kuko yatsinze ibitego bibiri ku busa byombi byatsinzwe mu gice cya kabiri.
Igitego cya mbere cya Nyanza FC cyatsinzwe na Kapiteni Mutabazi Jean Claude ku munota wa 57 mu gihe ikindi cya kabiri cyatsinzwe na Muhamyamana Edison ‘Essien’ ku munota wa 78. Nyanza FC iba itangiye umwaka w’imikino itsinda ibitego 2-0.
Nyanza FC izagaruka mu kibuga ikina na Rutsiro FC ku tariki 11 Ugushyingo 2023 mu mukino uzakirwa n’ikipe yo mu Burengerazuba bw’u Rwanda.
MUGIRANEZA THIERRY/ UMUSEKE.RW
