Mu ijambo yageneye abari mu birori byo gusoza umwaka mu ijoro ryo ku wa Gatandatu, Perezida Paul Kagame yavuze ko nta we ukwiye kwitwaza u Rwanda ngo agere ku nyungu ze.
Perezida Kagame yabanje kuvuga ibyiza u Rwanda rwagezeho muri uyu mwaka wa 2023, haba mu bukungu no mu bindi avuga ko hari indirimbo ivuga ngo “ibyiziza by’u Rwanda mvuge iki ndeke iki?”, ko ibyo Abanyarwanda bagezeho ari byinshi.
Yavuze ko u Rwanda rwakiriye inama zihuza amahanga y’isi yose, ibikorwa n’ibirori, n’imyidagaduro.
Ati “Twidagadura twishimira ibyiza ariko tutibagirwa ibibi byabaye, cyangwa bishobora kuba, wishimira ibyiza ndetse urishima witegura ibishobora kudusubiza inyuma kugira ngo bitaba.
Iyo wumvise abantu, mu Banyarwanda ni bake ariko bikuririzwa n’ab’ahandi, iyo wumvise umuntu ngo imigambi ye ni ugutera u Rwanda, akarushwanyaguza, icyo tutazi ni iki se? Aho ho gushwanyagurika twarahageze, turahazi ahubwo bizaba ku batekereza kugira gutyo.”
Perezida Felix Tshisekedi wa Congo Kinshasa, ubwo yarimo asoza ibikorwa byo kwiyamamaza, yavuze ko yarasa i Kigali ari i Goma.
Perezida Kagame yavuze ko ibyo bimaze kuvugwa hari abaje kumubwira ngo buriya ni ukugira ngo agere ku migambi ye (mu bijyanye n’amatora)…
Perezida Kagame ati “Gutekereza kugira nabi u Rwanda kugira ngo ibintu bikugendere neza wowe! Naravuze ngo niba mutari mutuzi twe ntabwo dutekereza kugirira nabi umuntu uwo ari we wese, ariko ntabwo ushobora kumbwira ngo uwo muntu buriya si wowe yavugaga. Kuri jye rero ngomba kwitegura kugeza igihe nzabonera ibimenyetso ko atari jye yavugaga.”
Yakomeje agira ati “Ntacyo tutabonye, ntagishobora kutubaho kuruta icyo twabonye. Ubwo rero ushaka kudukiriraho cyangwa kudukoresha kugira ngo agere ku bye, ibyo biramureba.”
- Advertisement -
Perezida Kagame avuga ko uko isi imeze ubu nta we uhari wagutabara, kuko nta n’uwahagurutse ngo yamagane ukora ibibi, no muri Jenoside yakorewe Abatutsi ngo ni ko byagenze.
Umwuka mubi wakomeje kuzamuka hagati y’u Rwanda na Congo, kuva umutwe wa M23 watangira intambara.
IJAMBO RYA PEREZIDA PAUL KAGAME
UMUSEKE.RW
