Umutwe wa M23 urwanya ubutegetsi bwa Repubulika ya Demokarasi ya Congo uvuga ko washyizeho abategetsi b’imijyi mu bice wafashe byo mu Ntara ya Kivu ya Ruguru mu burasirazuba bw’icyo gihugu.
M23 ivuga ko yashyizeho abo bategetsi mu rwego rwo gutuma “hakomeza gutangwa serivisi rusange ku baturage bo mu turere twabohowe” n’uwo mutwe.
Ibi bibaye mu gihe mu mpera y’icyumweru gishize, leta ya Amerika yavuze ko ihangayikishijwe bikomeye no kurenga ku gahenge guhera ku itariki ya 20 Ukwakira uyu mwaka, “gakorwa n’umutwe wa M23.”
Yongeyeho ko M23 igomba aka kanya guhagarika imirwano no kuva mu birindiro byayo muri teritwari ya Walikale, mu Ntara ya Kivu ya Ruguru, inasaba leta y’u Rwanda “gukura abasirikare bayo n’ibikoresho ku butaka bwa Congo.”
Leta ya Amerika yanasabye ko leta ya Congo ihagarika “gukorana n’umutwe witwaje intwaro wa FDLR”, urwanya leta y’u Rwanda ukorera mu burasirazuba bwa Congo, “wafatiwe ibihano na Amerika na ONU”, igafata n’ingamba z’aka kanya zo kuwusubiza mu buzima busanzwe .
Itangazo ryo ku wa kane , ryashyizweho umukono ku itariki ya 13 y’uku kwezi kw’Ugushyingo n’umukuru wayo wa politike Bertrand Bisimwa, M23 ivuga ko ubuyobozi bukuru bwa gisirikare bwasanze “bicyenewe kandi byihutirwa” gushyiraho aho bategetsi b’imijyi na za ‘centres’.
Abashyizwe mu myanya barimo nka Rodrigue Busimba, wagizw 7e umukuru wungirije w’umujyi wa Bunagana, na Gakomeye Bendera wagizwe ushinzwe iterambere muri uwo mujyi.
Hanashyizweho Bienfait Rukera, wagizwe umukuru wungirije w’umujyi wa Kiwanja, na Oscar Ndizihiwe, wagizwe ushinzwe gucyemura amakimbirane muri uwo mujyi.
Josée Zahabu yagizwe umukuru wungirije w’umujyi wa Rubare. Ni we mugore umwe mu bategetsi 17 bashyizwe mu myanya, mu bice birimo na ‘centres’ za Kibirizi, Nyanzale na Mweso.
- Advertisement -
IVOMO: BBC
UMUSEKE.RW
