Mbere y’uko imikino ibanza ya shampiyona irangira, Umunya-Cameroun ukina mu busatirizi, Armel Ghislain, yatandukanye na AS Kigali ashinja kutubahiriza amasezerano bagiranye.
Tariki ya 19 Kanama 2024, ni bwo AS Kigali ibinyujije ku rukuta rwa yo rwa X, yatangaje ko yamaze gusinyisha Umunya-Cameroun ukina mu gice cy’ubusatirizi, Ghislain Armel.
Iyi kipe yatangaje ko uyu mukinnyi yasinye amasezerano azamugeza mu mpera za 2025. Gusa uyu musore ugira ukwihangana guke, nta bwo yabashije gukomezanya n’iyi kipe kubera itinda ry’imishahara na tumwe mu duhimbazamusyi tw’imikino imwe n’imwe.
N’ubwo AS Kigali itaratangaza ko yaba yaratandukanye na Armel, amakuru ava imbere muri iyi kipe, avuga ko bamaze gutandukana ndetse amaze igihe yarahagaritse akazi.
Mbere y’uko agaruka mu Rwanda, yari yarasubiye iwabo muri Cameroun nyuma yo kuva i Kigali ari umukinnyi wa Gasogi United. Ni umusore wageze mu Rwanda azanywe na Kiyovu Sports yamumuritse.
UMUSEKE.RW
