TrAC yaguzwe n’ikigo Connecting Communities Africa (CCA) mu rwego rwo kwagura internet igerwaho na bose mu Gihugu.
TransAfrica Communications (TrAC), kimwe mu bigo biyoboye mu gutanga internet mu karere, ku itariki ya 06/10/2025 cyaguzwe na Connecting Communities Africa (CCA), umushinga ugamije impinduka nziza binyuze mu ikoranabuhanga, ushyira imbere kugeza internet mu bice itageramo neza.
TrAC yatangiye mu 2012 yitwa Axiom Networks, ifite intego yo kugeza internet yizewe ku miryango n’ibigo by’ubucuruzi byo mu Rwanda. Mu 2014, yabaye umuyoboro mpuzamahanga wa internet (international carrier), hanyuma ihindura izina mu 2021 iba TransAfrica Communications.
Kugeza ubu, TrAC itanga serivisi zayo zirimo: Internet y’umuyoboro mugari (wireless na fibre), imiyoboro yihariye (VPN), Serivisi za cloud n’ibijyanye no gukodesha umwanya mu ma Data Centre (collocation services).
Ikorera mu bihugu bitanu: u Rwanda, Uganda, Kenya, Tanzania, n’u Burundi.
Muri Nyakanga, 2025, TrAC yatangiye icyiciro gishya cyo kwaguka hamwe na Connecting Communities Africa (CCA), umufatanyabikorwa uharanira gutanga serivisi nziza, no kugera kuri bose.
CCA irimo gushyiraho icyicaro cyayo gikuru muri aka karere kikaba mu Rwanda, ibi bikaba byongera isura y’u Rwanda nk’igihugu gifite intumbero yo guhindura ubuzima binyuze mu ikoranabuhanga.
Hamwe n’ishoramari n’ubunararibonye, CCA izafasha TrAC kwagura umuyoboro, kunoza imikorere no guhuza abaturage benshi barimo n’abasigaye inyuma mu ikoranabuhanga.
CCA yahisemo gukorana na TrAC kubera ubunyamwuga, igipimo k’icyizere, n’icyerekezo rusange cyo guteza imbere iterambere rishingiye ku ikoranabuhanga.
UMUSEKE.RW