Nibura abanyeshuri barenga 20 bigaga mu ishuri rya ‘King David Junior School Ndejje’ muri Uganda, baba bapfiriye mu mpanuka y’imodoka y’ikigo yari ibatwaye bavuye mu rugendo shuri.
Uganda Radio Network ivuga ko abanyeshuri nibura 19 bo ku ishuri rya King David Junior School, Ndejje, bapfuye muri iriya mpanuka.
Aba banyeshuri bari mu modoka (bisi) nini bavuye gutembera.
Impanuka yabereye mu mudugudu wa Chekwatit, muri Komini nto ya Kawowo, mu Karere ka Kapchorwa, ahagana saa mbiri z’ijoro (20h00 p.m).
UBC UGANDA yo ivuga ko Minisitiri Balaam Barugahara yagiye ku Bitaro by’i Mbale (Mbale Regional Referral Hospital) gukurikirana uko abaganga bita ku banyeshuri bakomeretse.
Iki gitangazamakuru cyo kivuga ko “Bivugwa ko abanyeshuri barenga 20 bapfuye.”
Polisi ya Uganda yemeje amakuru y’iyi mpanuka, ivuga ko Polisi yo muri Kapchorwa yakiriye amakuru y’impanuka ikomeye yo mu muhanda yabaye kuri uyu mugoroba, ikaba ari bisi y’ishuri ifite nomero UA 108BQ, yari itwaye abanyeshuri bo ku ishuri rya Kings David Junior School, Ndejje.
Impanuka yabereye mu mudugudu wa Chekwatit, muri Paruwasi ya Kimawa, Komini nto ya Kawowo, mu Karere ka Kapchorwa.
Polisi ivuga ko yo n’izindi nzego zishinzwe gutabara byihutiye kugera ahabereye impanuka, bakora ibikorwa byo gutabara no kumenya umubare w’abapfuye n’abakomeretse.
Ubutumwa bwa Polisi buvuga ko kugeza ubu, umubare nyawo w’abapfuye n’abakomeretse utaremezwa neza ko andi makuru azatangazwa igihe azaba abonetse.
Ntabwo Polisi ya Uganda yavuze icyateye impanuka.
UMUSEKE.RW
