Kuva icyorezo cya COVID-19 cyatahurwa mu Rwanda muri Werurwe 2020, ni bwo bwa mbere hatangajwe umubare munini w’abarwayi batahuwe mu masaha 24, bikajyana n’umubare w’abantu benshi gihitanye ku munsi umwe.
Kuri uyu wa Mbere tariki ya 21 Kamena 2021, Minisiteri y’Ubuzima yatangaje ko habonetse abarwayi bashya 622 barimo 305 babonetse mu Mujyi wa Kigali mu gihe muri ayo masaha ntawavuwe ngo akire.
Iyi mibare itangajwe mu gihe hafashwe ingamba nshya zijyanye no kwirinda ikwirakwizwa ry’iki cyorezo, muri zo hakaba harimo kubuza ingendo zihuza Umujyi wa Kigli n’izindi Ntara ndetse n’ingendo zihuza Uturere, bigatangira kubahirizwa kuri uyu wa Gatatu.
Umubare w’abantu bamaze kwandura bose hamwe ni 31 435, abamaze gukira ni 26,704 kuko mu masaha 24 ntawavuwe ngo akire. Abakize ni bangana na 84.9% by’abantu batahuweho icyo cyorezo.
Ku wa Mbere COVID-19 yahitanye abantu batandatu, bituma abamaze guhitanwa na yo kuva yagera mu Rwanda bagera kuri 388.
Abapfuye ni uruhinja rw’amezi abiri (umukobwa), umugore w’imyaka 40, umugabo w’imyaka 37 b’i Kigali, abagore babiri b’imyaka 84 na 75 b’i Rubavu n’umugabo w’imyaka 36 w’i Huye.
Uretse abarwayi bashya 305 babonetse mu Mujyi wa Kigali, indi mibare ni iyo muri Kamonyi 40, Rubavu 35, Gicumbi 27, Nyabihu 24, Burera 24, Rwamagana 22, Musanze 21, Rutsiro 17, Rulindo 17, Gakenke 15, Ngororero 14, Kirehe 12, Nyamagabe 11, Muhanga 10, Nyanza 9, Ruhango 5, Rusizi 6, Huye 4, Nyagatare 3 na Karongi 1.
Ibipimo bimaze gufatwa kuva umurwayi wa mbere yatahurwa mu Rwanda ni 1,556,862 birimo 5,342 byafashwe mu masaha 24 ashize.
- Advertisement -
Abantu 71 bahawe doze ya mbere y’urukingo rwa COVID-19, bituma abamaze gukingirwa muri rusange bagera ku 390, 848. Abantu 247,087 bamaze guhabwa doze ya kabiri y’urukingo rwa (AstraZeneca), harimo 298 bayihawe ku wa Mbere tariki 21 Kamena 2021.
Muri rusange abarwayi bakirimo kwitabwaho n’abaganga mu Rwanda bageze ku 4,343 barimo abantu 13 barembye.
Abantu bose basabwa kubahiriza ingamba zashyizweho zo kwirinda Covid-19 zirimo gukaraba neza intoki, kwirinda kujya ahantu hateraniye abantu benshi, guhana intera, kwambara neza agapfukamunwa ndetse no kwisuzumisha kare ubonye ibimenyetso bidanzwe birimo ibicurane no kubabara umutwe.
REBA YouTube Channel UMUSEKE TV video nziza nk’iyi. UKORA LIKE SHARE na COMMENT
UMUSEKE.RW