Kuri uyu wa Kabiri tariki ya 29 Kamena 2021, Minisiteri y’Ubuzima yatangaje ko habonetse abantu 814 bashya banduye COVID-19 mu Rwanda, byazamuye umubare w’abarwayi ugera ku 10 495. Iki cyorezo cyahitanye abantu 4.
Abantu bane bapfuye barimo abagore babiri b’imyaka 104 (i Kigali) na 66 (i Rubavu) n’abagabo babiri b’imyaka 58 (i Rubavu) na 57 (i Huye).
Muri rusange abantu bishwe na COVID-19 kuva yakwaduka mu Rwanda muri Werurwe 2020 bageze kuri 431.
Abarwayi bashya barimo abo mu Mujyi wa Kigali 187, Burera 63, Kamonyi 59, Musanze 54, Bugesera 48, Rutsiro 32, Nyamagabe 31, Huye 29, Nyanza 27, Gakenke 26, Ngororero 26, Gicumbi 26, Rulindo 25, Rwamagana 20, Kayonza 17, Gatsibo 16, Nyagatare 16, Ngoma 15, Karongi 14, Muhanga 10, Nyamagabe 8, Kirehe 6, Nyaruguru 4, Rusizi 4, Ruhango 2, na Gisagara 1.
Mu Rwanda abanduye bose bagera ku 38,198 barimo 814 bashya, abamaze gutangazwa ko bakize icyorezo bagumye ku 27,272 kuko mu masaha 24 ashize nta muntu n’umwe wakize.
Imibare yatangajwe igaragaza ko abarwayi bakirimo kwitabwaho n’Abaganga bageze ku 10,495 barimo abarembye 36.
Ibipimo bimaze gufatwa kuva umurwayi wa mbere yatahurwa mu Rwanda ni 1,631,415 birimo 10,103 byafashwe mu masaha 24 ashize.
Ku wa Kabiri abantu 46 bahawe doze ya mbere y’urukingo rwa COVID-19, bityo abamaze gukingirwa muri rusange baracyari ku 391,785. Abantu 249,526 bamaze guhabwa doze ya kabiri y’urukingo (AstraZeneca), harimo 400 bayihawe ku wa Kabiri.
Guverinoma y’u Rwanda yafashe ingamba nshya zigamije kugabanya umuvuduko w’ubwandu bwa COVID-19 aho ingendo zihuza Umujyi wa Kigali n’iIntara ndetse n’izihuza Uturere zabaye zihagaritswe, n’amasaha yo kugera mu ngo avanwa saa tatu z’ijoro ashyirwa saa kumi n’ebyiri z’umugoroba (18:00).
- Advertisement -
Ku Isi, abamaze kwandura COVID-19 muri rusange bararenga miliyoni 182 barimo abasaga miliyoni 167 bakize ndetse na miliyoni 3.9 z’abantu bamaze kubura ubuzima kubera icyo cyorezo.
Abaturarwanda barasabwa kwitwararika bubahiriza ingamba zashyizweho, kwambara neza agapfukamunwa, gukaraba intoki kenshi n’isabune, guhana intera no kwirinda kujya ahantu hahurira abantu benshi cyane ahatari ukwisanzura.
REBA YouTube Channel UMUSEKE TV video nziza nk’iyi. UKORA LIKE SHARE na COMMENT
UMUSEKE.RW