Ntezirembo Jean Claude wari Umunyamabanga Nshingwakorwa w’Umurenge wa Muhanga, mu Karere ka Muhanga, na Niyomugabo Eric, bareganwa Gukoresha undi imibonano mpuzabitsina ku gahato umukobwa ukora mu kabari barekuwe n’Urukiko Rukuru rw’i Nyanza.
![](https://p3g.7a0.myftpupload.com/wp-content/uploads/2021/10/24-dsc_0333-8b2aa-97e52.jpg)
Ntezirembo Jean Claude yatawe muri yombi mu mwaka wa 2019, ashinjwa icyaha cyo Gukoresha Imibonano mpuzabitsina ku gahato umukobwa witwa Cyuzuzo n’ubwinjiracyaha bwo kwanduza undi indwara idakira, icyaha gihanwa n’ingingo ya 134 mu gitabo cy’amategeko ahana y’uRwanda.
Niyomugabo Eric we yaregwaga kuba icyitso ku cyaha cyo Gukoresha Imibonano mpuzabitsina ku gahato.
Ubushinjacyaha buvuga ko mu ijoro ryo ku wa 8 rishyira ku wa 09/Kanama/2019 Ntezirembo yari yakuye Cyuzuzo mu kabari amujyana iwe mu icumbi amuhatira gukora imibonano mpuzabitsina ku gahato, agamije kumwanduza Virusi itera SIDA na Sifirisi.
Urukiko rwemeje ko ikirego cy’ubujurire cya Ntezirembo Jean Claude na Niyomugabo Eric gifite ishingiro.
Rwemeje ko ikirego cy’ubujurire cyuririye ku kindi cya Cyuzuzo nta shingiro gifite.
Rwemeje ko Ntezirembo Jean Claude adahamwa n’icyaha cyo gukoresha undi imibonano mpuzabitsina ku gahato n’icyaha cy’ubwinjiracyaha no kwanduza undi indwara idakira.
Rwemeje ko Niyomugabo Eric adahamwa n’icyaha cyo kuba icyitso ku cyaha cyo gukoresha undi imibonano mpuzabitsina ku gahato.
Rwemeje ko imikirize y’urubanza RP 00689/2019/TGI/Muhanga rwaciwe taliki ya 12/12/2019 n’Urukiko Rwisumbuye rwa Muhanga, ihindutse mu ngingo zayo zose, Ntezirembo Jean Claude na Niyomugabo Eric bakaba bagizwe abere ku byaha baregwa.
- Advertisement -
Urukiko rwategetse ko Ntezirembo Jean Claude na Niyomugabo Eric bahita barekurwa urubanza rukimara gusomwa.
Rutegetse ko indishyi Ntezirembo Jean Claude na Niyomugabo Eric bari bategetswe guha Cyuzuzo zikuweho.
Urukiko Rwisumbuye rwa Muhanga rwari rwakatiye Ntezirembo Jean Claude igifungo cy’imyaka 15 n’ihazabu ya miliyoni 2Frw.
Naho Niyomugabo Eric rumukatira igifungo cy’imyaka 12 n’Ihazabu ya miliyoni imwe y’amafaranga y’u Rwanda.
Ukeneye kwamamaza! Gusobanuza! Gutanga amakuru? Hamagara 0788772818
MUHIZI ELISÉE
UMUSEKE.RW/Nyanza.