Ubushinjacyaha bwasabiye Hakuzimana Rashid gufungwa iminsi 30 y’agateganyo, uko iburanisha ryagenze

*Hakuzimana Abdoul Rashid n’umunyamategeko we basabye Urukiko kurekurwa kuko afunzwe muburyo bunyuranije n’amategeko.

Kuri uyu wa gatatu urukiko rwibanze rwa Nyarugenge rwasubukuye urubanza ruregwamo Hakuzimana Abdoul Rashid ni nyuma yaho rwaherukaga gusubikwa kuwa 10 Ugushyingo 2021 bisabwe na Hakuzimana Abdoul Rashid ubwe kuko umunyamategeko we Me Rutakemwa Jean Filex aburiye kumunsi w’urubanza icyo gihe urubanza rwarasubitswe kuko kuburana yunganiwe mumategeko biri mubyo yemererwa n’amategeko.

Icyo gihe Umucamanza yahise arwimurira kuwa 17 Ugushyingo 2021 Saa mbiri za mugitondo, kuri izo iyo saha nibwo Hakuzimana Abdoul Rashid yagejejwe ku Rukiko rwibanze rwa Nyarugenge avuye aho afungiye kuri Kasho ya Police ya Kicukiro .

Saa mbiri n’igice nibwo urubanza ku ifunga n’ifungurwa ryatangiye Inteko y’umucamnza umwe n’umwanditsi w’urukiko niyo yayoboye iburanisha rya none ubushinjacyaha buhagarariwe n’abashinjacyaha babiri.

Hakuzimana Abdoul Rashid yunganiwe mumategeko na Me Rudakemwa Jean Filex uyu munyamategeko yamenyekanye cyane mu rubanza rwa Dr Leon Mugesera kuko ariwe wamuburaniye kugeza urubanza rwa Dr Mugesera rubaye itegeko.

Umucamanza yatangiye asoma umwirondoro wa Hakuzimana Abdoul Rashid uregwa yahise abwira Umucamanza ko amazina y’ababyeyi be atariyo umwanditsi arakosorwa.

Umucamanza yahise amumenyesha ibyaha acyekwaho n’ubushinjacyaha aribyo, Icyaha cyo Guhakana Jenoside yakorewe Abatutsi muri mata 1994, icyaha cyo gupfobya Jenoside yakorewe Abatutsi n’Icyaha cyo gukurura amacakubiri muri rubanda n’icyaha cyo gutangaza amakuru y’ibihuha.

Hakuzimana Abdoul Rashid yahise abwira ubushinjacyaha ko ibyo byaha byose atabyemera.

Yagize ati “Njye ndaburana mpakana ibyaha byose.”

Me Rudakemwa Jean Felix wunganira Hakuzimana Abdoul Rashid yahise abwira umucamanza ashyizemo inzitizi mbere y’uko iburanisha ritangira.

Umucamanza yamubajije izo nzitizi uyu munyamategeko ati umukiriya wanjye afunzwe muburyo bunyuranije n’amategeko ndasaba ko mbere y’uko aburana ifunga n’ifungurwa yabanza akarekurwa by’agateganyo akazaburana adafunze.

Ubushinjacyaha bwahise busaba ijambo buvuga ko ibivuzwe na Me Rudakemwa Jean Felix ataribyo kuko Hakuzimana Abdoul Rashid afunzwe muburyo bwemewe n’amategeko kuko ubwo yatabwaga muri yombi kuwa 28 Ukwakira 2021 umugenzacyaha yabanje kumubaza niba abazwa yunganiwe.

Ati “Icyo Hakuzimana Abdoul Rashid yabwiye umucamanza ko atabazwa atunganiwe, Umugenzacyaha wamubazaga amuha igipapuro kimufunga by’abagateganyo kugeza ubwo yabonye umunyamategeko we yabonekeye abazwa yunganiwe kandi hubahirijwe ingingo ya 16 yo mugitabo cy’amategeko ahana y’u Rwanda.”

Hakuzimana Abdoul Rashid ubwo yafataga umwanya yabwiye umucamanza ko ubwo yabazwaga n’urwego rw’Ubugenzacyaha RIB, Umugenzacyaha wamubajije yamubwiye ko imyaka yafunzwe 8 muri gereza ntacyo yamumariye kuko yavuye muri gereza agakomeza kuroga Abanyarwanda.

Hakuzimana Abdoul Rashid ati ” Uwo Mugenzacyaha yambwiye ngo ibyaha nakoreye kuri You tube n’ibindi byaha nakoze mubihe bitandukanye agiye kubihuza amvugutire umuti.”

Hakuzimana Abdoul Rashid ati “Murumva ko iryo ari iyica rubozo nakorewe ryo mu mutwe ati ndasaba Urukiko ko uwo mugenzacyaha yazanwa hano mu rukiko agasobanura ibyo bintu byose yankoreye.”

Hakuzimana Abdoul Rashid yabwiye Urukiko ko ibyaha acyekwaho yakoze n’ukubishakisha ntabyabayeho.

Hakuzimana Abdoul Rashid ati “Njye nitabye nijyanye ntafunze ndasaba Urukiko ko nafungurwa kuko gukurikiranwa umuntu adafunze niryo hame kuko ntarindi perereza ry’ubushinjacyaha ricyenewe kuko ibyaha byose ndegwa biri kumbuga nkoranyambaga.”

Ubushinjacyaha bwagaragaje uburemere by’ibyaha Hakuzimana Abdoul Rashid yakoreye kumbuga nkoranyambaga mubihe bitadukanye harimo ikitwa Umuryabyo TV Ishema TV ,Umubavu TV na Shene yari yarashinze ye yitwa Rashid TV ndetse n’icyitwa Imbarutso ya Demukarasi TV .

Ubushinjacyaha bwagaragaje ko mubihe bitandukanye izo mbuga yazikoreyeho ibyaha bitandukanye bigaragaza gupfobya Jenoside yakorewe Abatutsi.

Ubushinjacyaha bwanavuze ko Hakuzimana Abdoul Rashid mu biganiro yakoze yagiye agaragaza ko mu Rwanda hakozwe Jenoside ebyiri aho yanasabaga ko “abatibukwa nabo bahabwa umwanya bakibukwa.”

Umucamanza yabajije Hakuzimana Abdoul Rashid niba haricyo yongeraho kubyari bimaze kuvugwa n’ubushinjacyaha.

Hakuzimana yasubije ko ntacyo yakongeraho kuko ataje kuburana mu mizi ko ahubwo yazanywe mu Rukiko aje kuburana ifunga n’ifungurwa ry’agateganyo.

Ati “Ntabwo nakwisobanura narafunzwe muburyo bunyuranije n’amategeko .”

Hakuzimana ati “Ndasaba ko narekurwa nkakurikiranwa ntafunze kuko gukurikirana umuntu adafunze ariryo hame.”

Yavuze ko ibyaha byose byavuzwe n’Ubushinjacyaha atabyemera asaba Urukiko kwemeza ko afunzwe mu buryo bunyuranyije n’amategeko.

Ubushinjacyaha bwabwiye Urukiko ko icyifuzo cyabwo busaba ko Hakuzimana Abdoul Rashid afungwa by’agateganyo iminsi 30 muri Gereza ya Nyarugenge kugirango ibyaha yakoreye kuri You tube bihagarare kuko we yamaze kubigira akamenyero.

Ubushinjacyaha bwakomeje buvuga ko indi mpamvu ikomeye ari uko uyu Hakuzimana Abdoul Rashid mugihe yaba abauranye mumizi Urukiko rukamuhamya ibyaha yahanishwa igihano kiri hejuru yimyaka ibiri.

Hakuziamana Abdoul Rashid yabwiye Urukiko ko mugihe ruzaba rwiherereye rutazaha agaciro icyifuzo cy’ubushinjacyaha kuko ubushinjacyaha ataribwo buhamya umuntu icyaha ahubwo Urukiko arirwo rwemeza ko umuntu yakoze icyaha cyangwa atagikoze.

Umucanza yumvise impande zombi apfundikira iburanisha avuga ko icyemezo ku ifunga n’ifungurwa kizasomwa kuwa 22 Ugushyingo Saa cyenda z’igicamunsi.

Iburanisha rya none ku ifunga n’ifungurwa ryamaze amasaha atatu.