Sénégal ntikije gukina n’Amavubi umukino wa Gicuti

Ikipe y’igihugu ya Sénégal yagombaga kwitoreza i Kigali hagati ya tariki ya 31 Ukuboza, 2021 na tariki 6 Mutarama, 2021 ntikije mu Rwanda.

Ku mugoroba wo ku wa Mbere, tariki ya 27 Ukuboza 2021, nibwo Augustin Senghor Perezida w’Ishyirahamwe ry’Umupira w’Amaguru muri Sénégal (FSF), yatangaje ko umwiherero wari kubera mu Rwanda wakuweho.

Augustin Senghor yavuze ko iki cyemezo cyafashwe nyuma y’ibaruwa Ishyirahamwe ry’Umupira w’Amaguru ku Isi, FIFA ryanditse ku wa 25 Ukuboza 2021, isaba ko abakinnyi bakina mu makipe y’i Burayi bazarekurwa tariki 3 Mutarama, 2022.”

Biturutse kuri iyi ngingo, Sénégal yafashe icyemezo cyo gukorera umwiherero i Dakar kuva kuri uyu wa Kabiri tariki 28 Ukuboza, 2021.

Biteganyijwe ko abakinnyi ba Senegal bakina i Burayi tariki 3 na tariki 4 Mutarama, 2022 bazaba bari mu gihugu cyabo, ikipe igahabwa ibendera ihita yerekeza muri Cameroun.

Augustin Senghor yavuze ko indege izabatwara izagwa ku kibuga mpuzamahanga cy’i Douala, kuko i Bafoussam hatemerewe kugwa indege zikora ingendo mpuzamahanga.

Ku rundi ruhande, Guinée na yo iri mu Itsinda rimwe na Sénégal muri CAN, yo iragera i Kigali kuri uyu wa Kabiri ndetse izakina imikino ibiri ya gicuti n’Amavubi tariki ya 2 na 6 Mutarama, 2022.

Biteganyijwe ko Shampiyona y’Icyiciro cya Mbere mu Rwanda ikinwa guhera kuri uyu wa Kabiri kugeza ku wa Kane, aho abakinnyi bazitabira umwiherero ku wa 30 Ukuboza, 2021 nyuma yo guhamagarwa n’umutoza Mashami Vincent.

Irushanwa ry’Igikombe cya Africa cy’Ibihugu rizaba tariki 09 Mutarama, 2022 kugeza tariki 6 Gashyantare, 2022.

UMUSEKE.RW