Umusifuzi wasifuriye Etincelles FC na As Kigali yahagaritswe ibyumweru 16

Kuri uyu wa Kabiri, Ishyirahamwe ry’Umupira w’amaguru mu Rwanda, Inama ya Komisiyo y’imisifurire yaryo yateranye ku wa Mbere tariki 13 Ukuboza, 2021 yahagaritse abasifuzi kubera imyitwarire mibi bagaragaje ku mikino bayoboye.

Iyi nama yanzuye ko abasifuzi bagaragaweho amakosa babihanirwa.

SIMBA Honoré yari Umusifuzi wungirije mu mukino wa shampiyona wahuje Musanze FC na Police FC tariki 10 Ukuboza, 2021 Komisiyo imushinja amakosa, ndetse yanzuye ko ahagarikwa ibyumweru 12.

UGIRASHEBUJA Ibrahim na we yagaragaweho amakosa mu mukino wa Etincelles FC na AS Kigali wakinwe tariki 12 Ukuboza, 2021 uyu yari umusifuzi wo hagati muri uyu mukino aho As Kigali biyigoye cyane yishyuye Etincelles banganya 1-1 hongeyeweho iminota 10 y’inyongera ariko na yo irarenga.

Umukino urangiye habaye imvururu abafana bashaka kwihimura ku basifuzi, Abapolisi baratabara.

Komisiyo yahanishije Ugirashebuja guhagarikwa ibyumweru 16.

GAKIRE Patrick we yari umusifuzi wungirije ku mukino wa Shampiyona y’ikiciro cya mbere mu bagabo Marine FC ikina na Mukura VS tariki ya 8 Ukuboza, 2021.

Amakosa yakoze yatumye ahagarikwa ibyumweru 12.

KWIZERA Fils yari umusifuzi ku mukino wa Shampiyona y’icyiciro cya kabiri mu bagabo wahuje aho Intare FC yakinaga na The Winners FC tariki ya 12 Ukuboza, 2021

Amakosa ye yatumye Komisiyo ifata umwanzuro wo kumuhagarika ibyumweru 16.

Ishyirahamwe ry’Umupira w’Amaguru mu Rwanda Komisiyo y’imisifurire yarya, ivuga ko yafashe ibi byemezo igendeye ku itegeko rigenga imisifurire mu FERWAFA mu ngingo ya karindwi (7) igika cya makumyabiri na rimwe (21).

FERWAFA ivuga ko itazihanganira amakosa y’imisifurire ayo ari yo yose kandi ko izakomeza gushyira imbaraga mu kongerera ubumenyi n’ubushobozi abasifuzi mu byiciro byose mu Rwanda.

Etincelles FC yari yandikiye FERWAFA isaba ibisobanuro ku minoto 10 y’inyongera ku mukino wayo na AS Kigali wari wabereye kuri Stade Umuganda.

Ibaruwa yanditswe ku wa 13 Ukuboza 2021, igashyirwaho umukono n’Umunyamabanga Mukuru wa Etencelles FC, Kabanda Innocent, basabya Ferwafa kubaza abasifuzi impamvu bongeyeho iminota ingana kuriya na yo ikongerwaho indi ibiri.

Ikibazo cy’imsifurire mu mikino y’umupira w’amaguru mu Rwanda gikomeje kuvugisha benshi ndetse bamwe mu bakurikiranira hafi ruhago yo mu Rwanda bahamya ko biri mu bidindiza uyu mukino, ahandi bagashinja abasifuzi kuryamo indonke.

FERWAFA ariko isa n’iya kanuye amaso, iherutse guhagarika abanda basifuzi basifura mu cyiciro byombi icya mbere n’icya kabiri kubera amakosa akenshi adasobanurwa ariko aba yagaragaweho abasifuye iyo mikino.

Abaherukaga guhagarikwa ni Ruhumuriza Justin (ibyumweru 4), Muneza Vagne (ibyumweru 3), Mulindangabo Mosie (ibyumweru 3), ndetse na NSABIMANA Claude.

https://p3g.7a0.myftpupload.com/apr-yatsinze-bugesera-fc-mu-gihe-as-kigali-byayisabye-iminota-112-kugira-ngo-yishyure.html

NKURUNZIZA Jean Baptiste / UMUSEKE.RW