Nyuma y’amezi 13, Casa Mbungo André wari umutoza mukuru wa Bandari FC yo muri Kenya yirukanwe n’iyi kipe nyuma yo kudatanga umusaruro yari yitezweho.
Itandukana rya Casa Mbungo na Bandari FC ryamenyekanye kuri iki Cyumweru, tariki 20 Gashyantare 2022, gusa amakuru ahari ni uko iki cyemezo cyari cyafashwe ku wa Gatandatu nyuma y’uko impande zombi zigiranye ibiganiro bakemeranya gutandukana.
Umusaruro nkene ukaba ari wo watumye Casa Mbungo yirukanwa kuko mu mikino 13 yaherukaga gutoza yatsinzemo imikino ibiri gusa, ni mu gihe ubwo yatangiraga shampiyona yari yahawe abakinnyi yifuza bamufasha harimo Chris Ochieng, Faraj Ominde, Andrew Juma, Boniface Mwagemi n’abandi.
Asize iyi kipe ku mwanya wa cyenda n’amanota 26, muri shampiyona akaba yari amaze gukina imikino 18, atsinda itandatu, anganya imikino umunani. Bandari FC irarushwa na Homeboyz iyoboye shampiyona amanota 11.
Muri Mutarama 2021, nibwo Casa Mbungo wari uvuye muri Gasogi United yagizwe umutoza mukuru wa Bandari FC asimbuye Ken Odhiambo, nyuma y’ukwezi ageze muri iyi kipe yahawe igihembo cy’umutoza mwiza w’ukwezi.
Casa yafashije Bandari kuza ku mwanya wa gatatu muri Shampiyona y’umwaka wa 2020-2021, Bandari FC ikaba yari ifite amanota 53, ikurikira KBC yari ku mwanya wa kabiri n’amanota 62 na Tusker yari yegukanye shampiyona n’amanota 65.
NKURUNZIZA Jean Baptiste
UMUSEKE.RW
