Polisi ikorera mu Karere ka Kamonyi kuwa Gatanu tariki ya 11 Gashyantare 2022, yafashe abantu 23 bari mu kabari barenze ku mabwiriza yo kwirinda no kurwanya icyorezo cya COVID-19.
Aba uko Ari 23 bafashwe mu saha ya saba z’amanywa, bafatirwa mu Murenge wa Runda,Akagari ka Ruyenzi, Umudugudu wa Rugazi, bateraniye mu kabari begeranye cyane, nyiri akabari nta ruhushya yari afite rumwemerera gucuruza.
Nyiri akabari, Ntezimana Gerard w’imyaka 39 Ari mu bafashwe .
Umuvugizi wa Polisi mu Ntara y’Amajyepfo , SP Theobald Kanamugire yavuze ko bariya bantu bafashwe biturutse ku bufatanye n’abaturage mu guhanahana amakuru.
Yagize ati” Twakiriye amakuru aturutse mu abaturage bavuga ko mu kabari ka Ntezimana hateraniye abantu barimo kunywa inzoga ndetse barimo no gusakuza cyane. Abapolisi bahise bajyayo basanga muri ako kabari hateraniye abantu benshi barimo kunywa urwagwa rwa kinyarwanda barenze ku mabwiriza yose yo kurwanya COVID-19, nyiri akabari nta cyangombwa yari yarahawe kimwemerera gufungura ako kabari nk’uko amabwiriza abiteganya muri ibi bihe byo kurwanya COVID-19.”
SP Kanamugire yaburiye abantu bagifite imyitwarire itari myiza yo kurenga nkana ku mabwiriza ya Leta yo gukumira no kurwanya ikwirakwira ry’icyorezo cya COVID-19.
Yabibukije ko icyorezo kitarangiye,anashimira abaturage bakomeje kugaragaza ubufatanye mu kurwanya icyorezo cya COVID-19 batanga amakuru igihe babonye abarenze ku mabwiriza.
Abafashwe bajyanywe ku biro bya Polisi sitasiyo ya Runda kugira ngo baganirizwe ku ngaruka n’ububi bw’icyorezo cya COVID-19 kugira ngo barusheho kukirinda.
- Advertisement -
Banapimwe icyorezo cya COVID-19 ku kiguzi cyabo, bashyikirizwa inzego zibishinzwe bacibwa amande.
Ivomo:RNP
TUYISHIMIRE RAYMOND\UMUSEKE.RW
