Kuri iki Cyumweru Shampiyona y’icyiciro cya mbere mu mupira w’amaguru yakomezaga ku bibuga binyuranye, APR FC ikomeza kwiruka kuri Kiyovu Sports itsinda Rutsiro FC igitego 1-0 ishimangira ko ikeneye igikombe naho AS Kigali ivana i Musanze inota rimwe.
Mu mikino y’umunsi wa 22 wa shampiyona yabaye kuri iki cyumweru tariki 20 Werurwe 2022, ikipe ya Bugesera FC ku kibuga cyayo yahatsindiye ibitego 3-1 Marine FC yo mu Karere ka Rubavu. Nimu gihe Gasogi United yari yasuye Espoir FC i Rusizi kuhakura atatu byabaye ingume itsindwa igitego 1-0.
Indi mikino yabaye ni uwahuje APR FC na Rutsiro FC kuri sitade ya Kigali i Nyamirambo uza kurangira APR FC yerekanye ko iri munzira zo gushaka igikombe irimo irwanira na Kiyovu Sports, ni ku ntsinzi y’igitego 1-0 cya Mugunga Yves yatsinze ku munota wa 74 nyuma yo kujya mu kibuga asimbuye.
Ikipe ya GorillaFC yabashije kubona amanota atatu iyakuye Rubavu kuri iFC, ku bitego 2-1. Gicumbi FC ya Banamwana Camarade yanganyirizaga ku kibuga cyayo na Police FC igitego 1-1.
Undi mukino wabaga kuri iki Cyumweru ni uwahuje Musanze FC na AS Kigali kuri sitade Ubworoherane, maze AS Kigali inanirwa gukura amanota atatu i Musanze nyuma yo kuhanganyiriza igitego 1-1.
Umunsi wa 22 wa shampiyona wari wanakinwe ku wa Gatandatu tariki 19 Werurwe, aho Kiyovu Sports na Rayon Sports zari zihanzwe amaso n’abatari bake bashakaga kumenya nimba Haringingo Francis Christian akomeza urugendo rugana igikombe, maze abishimangira atsinda Rayon Sports ibitego 2-0 bya Bigirimana Abedi na Muhoozi Fred.
Ni mu gihe kuri uwo munsi Mukura VS yanganyiriza mu Karere ka Ngoma na Etoile de l’Est ubusa ku busa.
Umunsi wa 22 wa shampiyona usize Kiyovu Sports iyoboye urutonde n’amanota 50, ikurikirwa na APR FC bakomeje gukubana n’amanota 48. Mukura VS ni iya gatatu n’amanota 38, AS Kigali mu mwany wa kane n’amanota 36 naho Rayon Sports ni iya gatanu n’amanota 35 irusha atatu Police FC ya gatandatu.
Shabani Hussein Chabalala wa AS Kigali niwe uyoboye abamaze gutsinda ibitego byinshi n’ibitego 12, akurikiwe na Nwosu Samuel wa Etoile de l’Est n’ibitego 10.
- Advertisement -
Hassan Djibrine wa Gasogi United afite ibitego 9, Bigirimana Adedi wa Kiyovu SC afite ibitego 8.
Ishimwe Fiston wa Marine Fc afite ibitego 6 anganya na Ocen Ben wa Musanze FC, Usengimana Dany wa Police FC na Adeaga Adeshola wa Gorilla FC.
Umukinnyi wa APR FC ufite ibitego byinshi ni Bizimana Yannick ufite 5, uwa Rayons Sports we ni Onana Willy Leandre ufite nawe ibitego bitanu bihuriwe n’abakinnyi benshi.
Umunsi wa 22 wa Shampiyona usize ikipe ya Kiyovu Sports iyoboye urutonde rwa Shampiyona ikaba ikurikiwe na APRF Fc.
NKURUNZIZA Jean Baptiste / UMUSEKE.RW
