Abaririmbyi bo mu itorero Zion Temple Celebration Center, Ngoma, Gatenga, Asaph Music Interanational, bagiye guhuriza hamwe abaramyi bakomeye ndetse n’amakorari mu gitaramo cyiswe”Evening of Connecing Heaven- EARTH.
Ni igitaramo kizaba kuri uyu wa Gatanu tariki 15 Mata 2022, kuri Zion Temple Celebration Center Gatenga, guhera saa kumi z’umugoroba (4h 00pm) kugeza saa sita z’ijoro (00H00 am ).
Muri icyo gitaramo , hazaririmbamo Aime Uwimana, Rene Patrick, Ishimwe Josh uzwi mu ndirimo zo guhimbaza Imana mu muco Nyarwanda, Confi, Gisubizo Minstry ,Healing Worship Team ,Asaph Kibagabaga na Asaph Rubilizi .
Umuyobozi w’Indirimbo muri Asaph Music International yateguye iki gitaramo, Kanuma Damascene, yabwiye UMUSEKE ko impamvu bagiteguye, ari uko bashakaga kwinjiza abantu muri pasika baramya ndetse banahimbaza Imana.
Ati “Imyiteguro irarimbanyije. Turifuza kubona ijuru rimanuka, intebe y’Imana ikamanuka mu bwoko bw’Imana cyane cyane mu gihugu cyacu ndetse no ku mahanga.”
Yakomeje ati “Muri iki gihe twumvise tuyobowe n’umwuka, uduhata cyane gutegura ikintu nk’iki kuko twari tumaze igihe kinini ducecetse, turavuga ngo reka dutegure ikintu cyibutsa abantu ko Yesu yapfuye Akazuka.Turi gutegura umugoroba wa Pasika. Turavuga ngo mbere y’uko Pasika iba ,reka dutegure umugoroba wo kuramya Imana no kuyihimbaza.”
Iki gitaramo kigiye kuba mu gihe kuri iki cyumweru abakirisitu bitegura umunsi mukuru wa Pasika, bizihiza izuka ry’umwami Yesu\Yezu.
Ni mu gihe kuri uyu wa Gatanu, Abakirisitu gatorika bo bazaba bizihiza,Uwagatanu Mutagatifu, bazirikana ububare Yesu yagize mbere y’uko abambwa ku musaraba.
TUYISHIMIRE RAYMOND / UMUSEKE.RW